KUCHING: Ngetanka semangat asal Sempekat Malaysia 1963 (MA63) beguna endar lebih agi bekaul pemutus kort ti ulih ngerumpang sempekat nya.
Yang di-Pertua Negeri Sarawak Tun Pehin Sri Dr Wan Junaidi Tuanku Jaafar bechunto ke pekara ba baruh Akta Imigresen ti meri kuasa ngagai Perintah Sarawak nagang orang tama ke Sarawak ke alai kort bisi kuasa nentu sekali ke ulih dipejalai tauka enda.
Iya nerang, pekara nya deka terus ngerumpang semangat MA63 lalu deka ngasuh mayuh isu nyadi ketegal kuasa nya.
“Enti pekara tu nyadi, semua tuju Sempekat Malaysia nya deka berubah magang laban semangat asal sempekat nya deka diiarka doktrin struktur pemun ti ngasuh sekeda penanggul tau nyadi ari isu nya,” terang iya.
Iya nerang pekara nya ba Pengerami Makai Lemai ICM serimbai Istiadat Penganugerahan 'Bencher' terubah Yang di-Pertua Negeri Sarawak kena Hari Enam.
Tun Pehin Sri Dr Wan Junaidi madah baru, Sempekat Malaysia 1963 taja ukai sebagi ari teks Konstitusyen Perintah Besai tang agi ngembuan nilai undang-undang enggau politik ti signifikan nempa kaul entara nengeri enggau Perintah Besai.
Ku iya, pemutus kort nentuka hak ti bisi ba MA63 ngangkai sekali ke nya diaku nyadi siti atur tauka nyadi sebagi ari utai dikumbai doktrin struktur asas.
“Enti enda, dia hak ti diberi ngagai Sarawak enggau Sabah ngena kuasa imigresyen dikena nagang orag tama ti diterima nyadi pekara pemun ngagai rayat Sarawak enggau Sabah deka bepanggai ba pemutus kort,” ku iya.
Sama datai, bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Sapit Menteri Besai Dato Sri Fadillah Yusof Penyanding Penemu ICM Tun Dato Seri Zaki Tun Azmi, Presiden ICM Tun Ariffin Zakaria, Tuai Akim Menua Dato Wan Ahmad Farid Wan Salleh, Yang Dipertua Dewan Negara Dato Awang Bemee Awang Ali Basah, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Duta Besai Amerika Syarikat Ke Malaysia Edgard D. Kagan, Presiden Kort Apil Dato Abu Bakar Jais, Tuai Akim Malaya Tan Sri Hasnah Dato Mohammad Hashim, Tuai Akim Sarawak enggau Sabah Datuk Azizah Nawawi sereta bala pemesai dipebasa bukai. -EDISI UKAS
