KUCHING: Inisiatif Inns of Court Malaysia (ICM) ti bepuguka model ba menua Britain enggau Amerika Syarikat tang ngena gaya Malaysia ulih nyadi penyungkak ngagai transformasyen bidang undang-undang menua.
Sapit Menteri Besai Dato Sri Fadillah Yusof madah, ICM nya ngajar enggau ngembing raban profesional ari serap spektrum pekara undang-undang, lebih agi bala nembiak dikena narak profesional undang-undang tinggi.
“Enda lama da, enggau ICM nyadi terabai, kitai deka meda 'barristers' Malaysia ti ada ba menua tu, taja ukai 'King’s Counsel', dilatih nyadi pakar enggau bepenau ba undang-undang, sekali ke ari sukut prosedur tauka substantif.
“Tu mega ngasuh sida ngembuan pengandal, gaya enggau landik ba sosial ti beguna dikena maju ba sebarang pengawa lalu mayuh agi orang nyulut ba Malaysia deka diaku nyadi 'Benchers'," ku iya.
Iya nyebut jaku nya lebuh Pengerami Makai Lemai ICM serimbai Istiadat Penganugerahan 'Bencher' terubah Yang di-Pertua Negeri Sarawak Tun Pehin Sri Dr Wan Junaidi Tuanku Jaafar ti sama datai, kena Hari Enam.
Iya madah baru, pengawa nya deka negapka agi penuduk Malaysia ngemansangka jurisprudens kediri ti relevan enggau gaya menua.
Kelimpah ari nya, Dato Sri Fadillah mega madah ke enda ibuh senurut ajar ari menua luar ti tau ngachau pengelurus sereta meri empas enda manah ngagai raban pechara.
“Kitai mega bisi dinamika ekonomi, struktur sosial enggau pemar menua diri ti begunaka chara mutar kitai empu.
“Teju aja jurisprudens Malaysia mansang enggau andal, nyulur identiti nyelai kitai, ngambi dudi hari deka nyadi malin ti dipebasa ba selampur Komanwel,” ku iya.
Sama datai, bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, Penyanding Penemu ICM Tun Dato Seri Zaki Tun Azmi, Presiden ICM Tun Ariffin Zakaria, Tuai Akim Menua Dato Wan Ahmad Farid Wan Salleh, Yang Dipertua Dewan Negara Dato Awang Bemee Awang Ali Basah, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Duta Besai Amerika Syarikat Ke Malaysia Edgard D. Kagan, Presiden Kort Apil Dato Abu Bakar Jais, Tuai Akim Malaya Tan Sri Hasnah Dato Mohammad Hashim, Tuai Akim Sarawak enggau Sabah Datuk Azizah Nawawi sereta bala pemesai dipebasa bukai. -EDISI UKAS
