KUCHING: Jalai akses ti nyambung Jalai Datuk Mohammad Musa di Samarahan ke zon selatan Padang Bilun Antarabansa Kuching (LTAK) disadang tembu menyana lalu ulih ditengah bala penguna September tu.
 
Menteri Kereja Raya Dato Sri Alexander Nanta Linggi madah ke projek jalai perintah besai sepanjai lapan kilometer nya deka nyadi jalai alternatif beguna dikena ngurang penanggul jalai sekut entara Kota Samarahan enggau tengah mengeri Kuching.
 
“Naka diatu, projek tu udah 96 peratus digaga. Lalu empat peratus da kereja agi dipejalai ngaul pengawa ngadu penyikap jalai enggau lampu. Aku dipadah semua kereja disadang tembu bulan baru,” ku iya pengudah ngabas taba projek, sehari tu.
 
Ngenang silik agi, iya madah ke projek infrastruktur dipejalai di baruh Langgur Pemansang Malaysia Lumpar Ke-13 (RMK-13) deka terus diadu setipak enggau Strategi Pemansang Pengudah COVID-19 (PCDS) 2030 ti dirintai Perintah Sarawak.
 
Ku iya, projek infrastruktur baka jalai alun, perengkaguna pelajar, pengerai enggau sektor industri nya entara komponen besai diberi perati, lebih agi dikena nyukung juluk nengeri tu nuju kuasa gadung enggau teknologi meruan.
 
“Ba dokumen RMK-13 dipadah ke Sarawak enggau Sabah deka nyadi hab besai industri kuasa menua. Nya alai, projek infrastruktur baka tu chukup engkeman,” ku iya.
 
Dato Sri Alexander mega nyemetak madah ke Opis Menteri Kereja Raya (KKR) nengah Opis Kereja Raya (JKR) ransing gawa nyadi raban ngaduka projek perengkaguna menua.
 
“Kelimpah ari ngaga jalai alun, JKR mega nyukung opis menteri bukai baka Opis Menteri Pelajar enggau Opis Menteri Pengerai bejalaika projek pemansang enggau nyeleti sekula, kolej, hospital sereta klinik,” ku iya.-BERNAMA
Kredit berita: BERNAMA