MIRI: Sepenyampau 22 nembiak ari Zon Utara Sarawak udah masuk Pekit Pidato Jaku Iban Trofi Dato Dr. Nuing Jeluing ungkup Kategori Sekula Sekondari Besai Zon Utara Sarawak 2025 ti diatur di Pustaka Negeri Sarawak, ditu, kena Hari Enam.
 
Pekit diatur Serakup Dayak Miri (DAM) enggau kerejasama Pustaka Negeri Sarawak nya edisyen keempat udah diatur, lalu terus nyadi pelasar beguna ngelati Jaku Iban ba bala nembiak sereta narak pemereti ati senentang nilai budaya enggau pesaka Dayak.
 
Renggat tumu diatur 1 Ogos 2025 di Rumah Dayak Miri marit pemekit ari 22 iti sekula sekondari Zon Utara, lalu ari penyampau nya, bisi 10 pemekit pemadu nyulut udah dipilih bepekit ba renggat kepenudi.
 
Ngena sulu jaku Dikelala Bansa Ari Jaku, bala pemekit mantaika pidato tauka belaban penemu pasal pemesai guna jaku ti nyadi pugu penyerakup enggau identiti bansa.
 
Menteri ba Opis Premier Sarawak, Dato Sri John Sikie Tayai madah ke pekit nya ukai semina nyidi penau nembiak bejaku ba mua mayuh aja, tang ulih negap nembiak nguasa jaku sereta nambah pengandal diri ngagai raban biak.
 
Kelai sukung ngagai pengawa ngatur pekit nya, iya mega ngemendarka agih belanja sepenyampau RM25,000 ungkup edisyen nangkan nya.
 
Pemutus pekit mandangka Dimas Imanuel Jimmy ari SMK Marudi dipadu nyadi champion, dientudi Vanessa Vania Andy Belaka ari Kolej Tun Datu Tuanku Haji Bujang ba penuduk kedua, seraya lumur tiga diempu Juliana Mariana Ajok, juga ari SMK Marudi.
 
Pekit nya mandangka pengeransing Serakup Dayak Miri nyagu Jaku Iban nyadi jaku penemu enggau batang jaku ngagai bala nembiak, sereta negap kapesaka budaya raban bansa Dayak di Sarawak.-EDISI UKAS