MIRI: Komiti Penyangga Penusah Bagi Menua (JPBB) Miri berumban mutar penusah tanah kerapa angus ba Kuala Baram enggau Senadin.
 
Menteri Pengangkut Sarawak merangkap ADUN Senadin, Dato Sri Lee Kim Shin ngetuai ke pejalai matau ngagai sekeda endur ti angus nyengkaum taba projek Kenyalang Smart City, genturung berumah North City Development Sdn Bhd, enggau kandang ngelingi Menara Tinjau Tudan.
 
Ba pejalai nya, Dato Sri Lee madah ke urung 150 ikar tanah kerapa udah angus kena 25 enggau 27 Jun nyin tadi.
 
Penusah nya mega diripot ngagai JPBN Sarawak lalu pengawa bukai udah dipejalai.
 
Iya nyemetak madah ke semua agensi patut ngasi ke SOP, lebih agi maya musin kemarau ti ngasuh penusah angus mudah nyadi.
 
Pengawa nya nyengkaum matau ngena dron, ngerawang parit nekat api, ngena jentera ngerara api dalam tanah enggau bejalaika operasyen Menara Tinjau Tudan enggau telaga tiub dalam tanah ke alai raban DID mega dipinta ngadu pam air ba genturung Curtin ngambi tanah semampai embap.
 
“Kerejasama mayuh agensi teknikal baka JAS, NREB, JMG, JKR, RELA enggau Bomba terus dikerah enti sema penusah majak raya, ngena bilun Bombardier dikena ngebom ai ari langit deka diperunding,” terang iya lebuh dirandau pemberita ditu, kena Hari Lima.
 
Sama datai, Residen Bagi Menua Miri, Galong Luang disempulang 30 pengari agensi bekaul.-EDISI UKAS