BANDAR SERI BEGAWAN: Perintah Sarawak deka nyerungkai mayuh agi peluang kerejasama strategik begulai enggau Brunei Darussalam ba mayuh macham bidang.
Sapit Premier Sarawak Datuk Amar Awang Tengah Ali Hasan madah, nengah kaul enggau dagang ti udah lama ditanggam, penyampau asil dagang Sarawak enggau Brunei Darussalam manggai urung RM3.39 billion ba taun 2024.
Iya madah, bekunsi adan menua enggauBrunei Darussalam meri pengelebih ngagai Sarawak nanggam kaul rat enggau perintah menua nya nyengkaum komuniti dagang enggau rayat dia.
“Ari baruh Strategi Pemansang Pengudah COVID-19 (PCDS) 2030, juluk Sarawak nyadi siti ekonomi maju nengah ekonomi tumbuh ti inklusif, meruan enggau bepelasarka inovasyen.
“Bisi mayuh peluang ti udah diserungkai Sarawak enggau Brunei Darussalam mungkur pengulih kerejasama ba bidang kuasa gadung enggau hidrogen, telekomunikasyen, betanam betupi enggau pemakai halal, logistik enggau infrastruktur adan menua, bioekonomi, pansik enggau pemansang sereta pemansang penau,” terang iya.
Iya nyebut pekara nya ba jaku ngelalu rambau bejadi program Citarasa enggau Tautan Budaya Sarawak-Borneo 2025 di Stadium Negara Hassanal Bolkiah kena Hari Enam.
Program diatur Opis Dagang enggau Dagang Temuai Sarawak, Brunei (STATOB) nya udah dipenyadika Menteri ba Opis Menteri Besai Brunei Darussalam, Dato Seri Setia Dr Awang Amin Liew Abdullah.
Datuk Amar Awang Tengah ti mega Menteri Dagang Antarabansa, Industri enggau Meranak Puku Sarawak (MINTRED) madah baru, sistem pematau Brunei Darussalam ti tegap enggau pengaya biodiversiti Sarawak nyendiaka mayuh agi pengulih kerejasama, lebih agi ba produk herba enggau nutraseutikal.
Nambah ke nya ku iya, Sarawak mega sama ransing ngintu kampung enggau bela nyerungkai industri dagang karbon.
Nya alai, STATOB deka terus regas ngesan pangku pengawa diri – ukai semina ngelaku aja, tang nyadi jematan strategik enggau ngemuntang pengawa ba kerejasama serantau entara Sarawak enggau Brunei Darussalam.
“Sarawak deka terus bekerejasama enggau Brunei ngelaku program dagang temuai begulai sereta ngangkatka Borneo nyadi palan ditapat, ngena manah Padang Bilun Antarabansa Brunei nyadi hab serantau.
“STATOB nyendiaka servis sanding penemu ngagai pedagang, pemeranak puku enggau pemekuh industri dagang temuai, sereta dikemudi pegawai ari kededua kandang menua.
“Tu nyaup pengimport Brunei, pengeksport Sarawak sereta pemeranak puku ti deka beambi ulih ari palan strategik Brunei di Asia Tenggara,” ku Datuk Amar Awang Tengah madah baru.
Sama datai, bini Datuk Amar Awang Tengah, Dato Dayang Morliah Awang Daud, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat, Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED) Dato Sri Mohd Naroden Majais, Tuai Pegawai Eksekutif STATOB Samat Junai enggau pemesai dipebasa bukai.- EDISI UKAS
