KUALA LUMPUR: Sarawak nurai pemujur besai ba tikas nasional lebuh dipadu nyadi Champion Anugerah Pavilion Citra Nengeri enggau Ikon Siti Pelilih Siti Industri (SDSI) 2025 serimbai enggau Mega Karnival 3 Dimensi 2025 ti diatur ba Palan Pemandang enggau Dagang Antarabansa Malaysia (MITEC), Kuala Lumpur.
 
Anugerah nya udah disua Menteri Besai, Dato’ Seri Anwar Ibrahim ba Pengawa Bejadi Mega Karnival 3 Dimensi kena Hari Enam.
 
Ba Anugerah Pavilion Citra Nengeri, Sarawak dipadu nyadi champion enggau nerima perais mata duit RM10,000 sereta setipikit.
 
Pengawa nyuaka perais udah diadu ngena simbolik ngagai Connie Christopher Kesa, ngari ke Opis Menteri Dagang Antarabansa, Industri enggau Meranak Puku Sarawak (MINTRED).
 
Sarawak ti ngambi bagi ba karnival nya betuai ke MINTRED enggau kerejasama strategik ari mayuh agensi nyengkaum Opis Menteri Dagang Temuai, Industri Kreatif enggau Seni Pemerindang (MTCP), Opis Menteri Nembiak, Lumba enggau Pemansang Orang Dagang (MySED), Kaunsil Pemansang Ekonomi Sarawak (SEDC), Opis Betanam Betupi Sarawak (DOA) enggau CRAUN Research Sdn Bhd.
 
Seraya ba kategori Ikon SDSI 2025, orang dagang Sarawak, Fitriah Rahbi ari RFM Global Corporation, dipadu nyadi pemenang.
 
Kompeni iya tebilang enggau inovasyen produk ari Terung Iban, utai tanam nyelai ti semina bisi ba Sarawak.
 
Iya nerima perais mata duit RM10,000 enggau setipikit basa.
 
Sepenyampau 11 kompeni orang dagang Sarawak ngambi bagi ba pemandang SDSI sekali tu, mungkur mayuh kluster baka pemakai enggau ai irup, endur bemalam, nyaga diri enggau krafjari.
 
Entara produk nyelai ti dipandang baka Terung Iban, Linut, Gula Apong, Kek Lapis Sarawak enggau bemacham produk kraf ti mandangka pengaya budaya enggau pengeraja asal Tanah Kenyalang.
 
Mega Karnival 3 Dimensi ti diatur berengkah ari 30 Julai nyentuk 3 Ogos 2025 nya inisiatif begulai Opis Menteri Pemansang Menua Pesisir enggau Kandang Menua (KKDW), Opis Menteri Pemansang Orang Dagang enggau Gerempung Kerejasama (KUSKOP) enggau Kaunsil Pemansang Tanah Perintah Besai (FELDA) ti ngempung tiga program besai iya nya Karnival Orang Dagang Menua Pesisir (KUD), Showcase SDSI enggau Hari Peneroka FELDA (HPF).
 
Tuju program tu ngempuru enggau ngaku orang dagang lokal ari selampur menua sereta mantaika pengulih industri menua pesisir.
 
Sama datai, Sapit Menteri Besai ti mega Menteri KKDW Dato’ Seri Dr. Ahmad Zahid Hamidi, Menteri Pemansang Orang Dagang enggau Gerempung Kerejasama (KUSKOP) Datuk Ewon Benedick, Tuai Sekretari Menua Tan Sri Shamsul Azri Abu Bakar, enggau Tuai Peneroka FELDA Kebangsaan Sulong Jamil Mohamed Shariff.-EDISI UKAS