SARIKEI: Festival Sarikei 2025 ti mai rambai jaku “Unite in Culture, Rich in Heritage” ngayanka semangat segulai sejalai enggau pengelain budaya ti nyadi pugu ngagai pemansang rayat enggau nengeri.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, pengerami besai nya diperati nyadi pelasar strategik negapka identiti lokal kelimpah nyungkak pengulih Sarikei nyadi hab betanam betupi moden enggau palan dagang temuai komuniti.
“Suba dikelala enggau Pesta Nanas enggau Buah-Buahan, diatu Sarikei Festival datai enggau gaya baru, inklusif agi enggau besai empas, negap seni, budaya, pesaka enggau pengawa dagang lokal,” ku iya.
Iya bejaku munyi nya nengah teks jaku dibacha Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei Dato' Sri Huang Tiong Sii lebuh Pengawa Bejadi Festival Sarikei 2025 di Terminal Satu Sarikei ditu, kena Hari Enam.
Berebak enggau nya, iya madah ke rambai jaku pengerami sekali tu mai reti chukup besai ti meransang rayat terus ngetanka pengelain budaya enggau negap penyerakup ti nyadi pugu pemeruan menua dudi hari.
Festival Sarikei 2025 diperati ukai semina penyungkak ekonomi lokal tumbuh aja, tang mega meri peluang baru ba sektor dagang temuai enggau dagang rayat.
Agih belanja sepenyampau RM20,000 mega udah dikemendar dikena neruska program enggau aktiviti sepanjai festival diatur.
Sarikei Festival 2025 udah berengkah 25 Julai 2025 lalu tembu diatur kena 3 Ogos 2025 enggau bemacham isi program baka pemandang agro, ekspo produk lokal, mantaika main asal, pekit main asal enggau pemerindang seni rayat.
Pengerami ninting taun nya terus gah nyadi entara pengerami komuniti pemadu ikonik ba Sarawak, ngangkatka Sarikei nyadi menua nyulut agi ba pelin pemansang nengeri.
Pengerami nya mega digulu Kaban Kunsil Nengeri (ADUN) Meradong Datuk Ding Kuong Hiing, ADUN Meluan Rolland Duat Jubin, Residen Bagi Menua Sarikei, Datu Michael Ronnie Langgong, bala pengari agensi perintah, bala pedaja, Gempung Ukai Dikuasa Perintah (NGO), raban nyaga pengelikun, voluntia enggau beribu pengusung lokal enggau datai ari luar ti nedat tebing ai nya.- EDISI UKAS
