SIBU: Perintah Sarawak diatur ngena projek pemungkal Ease of Doing Business (EODB) ba Sibu ngambi proses rejista enggau ngadu lisin dagang muntang agi.
 
Sapit Sekretari Perintah Sarawak (Operasyen) ti mega Penyanding Penemu Projek EODB, Datu Hii Chang Kee madah, tuju inisiatif nya mantu mensia mayuh enggau komuniti dagang ari ngempung semua atur pengawa ti sebedau diadu ba tiga endur bebida, diatu ulih diadu ba siti nalan iya nya Palan Servis Sarawak (Service Sarawak) tauka UTC.
 
“Sebedau tu, dikena ngepunka dagang mit, peminta meseti ngelawa Opis Pelilih ngambi rejista nama dagang, udah nya ke Perbendaharaan ungkup lisin dagang, lalu kepenudi ngelawa raban bekuasa lokal (PBT) ungkup lisin operasyen.
 
“Tang diatu, semua pengawa tu ulih diadu ba siti nalan aja – ba Palan Servis Sarawak tauka UTC.
 
“Sida semina ngisi siti pom aja, lalu datai dua kali – terubah nya minta enggau mayar, kedua kali ngambi lisin,” ku iya lebuh dirandau media pengudah ngabas UTC Sibu kena Hari Lima.
 
Datu Hii madah baru, ungkup peminta ti semina rejista nama enggau lisin dagang aja, pemendar disadang kandang lima hari opis gawa.
 
Seraya peminta ti mega ngaul lisin operasyen ari raban kaunsil, ku iya, nya deka diadu kandang 14 hari opis gawa, bepanggai ba tikas risiko premis nya.
 
Ku iya, ba kategori dagang bisi risiko besai baka palan karaoke, palan pemerindang, palan tuisyen enggau stor nyimpan kereban petroleum, timpuh dikemendar nyentuk 30 hari opis gawa laban meseti dituku enggau diperesa agensi bukai baka Polis DiRaja Malaysia (PDRM), Opis Bomba enggau Penyah Penusah Malaysia (JBPM) tauka Opis Pelajar.
 
Iya madah baru, sistem nya semina dipejalai ba Sibu enggau Kanowit aja naka diatu nyadi projek pemungkal pengelama enam bulan, sebedau sebarang ubah undang-undang digaga ngambi kaunsil nyadi palan semua opis.
 
Ngenang pasal jam gawa, Datu Hii madah ke pengawa ngadu lisin diterima ari Hari Satu ngagai Hari Lima, 8 pagi ngagai 3.30 ngalih hari baka selama.
 
Ku iya, jam gawa ujung minggu enda ngaul pengawa ngadu lisin laban sistem kutipan agi bepanggai ba jam bank gawa.
 
Datu Hii ngarap ke dagang baru di Sibu ulih ngena peluang nya rejista enggau muntang sereta jampat agi, lalu nyukung ekonomi dia tumbuh.
 
Bela datai, Direktor Unit Transformasi enggau Inovasyen Sarawak Superi Awang Said, Pegawai Pelilih Sibu Wee Teck Min, Chairman Kaunsil Mengeri Sibu (MPS) Kaunselor Clarence Ting Ing Horh, enggau Sekretari Kaunsil Pelilih Menua Pesisir Sibu Ng Siang Wei.-EDISI UKAS