BANDAR SERI BEGAWAN: Kerejasama rat entara Perintah Brunei Darussalam enggau Sarawak terus ditegap nengah pengawa ngatur program Citarasa enggau Tautan Budaya Sarawak-Borneo 2025 diatur Opis Dagang enggau Dagang Temuai Sarawak, Brunei (STATOB).
Menteri ba Opis Menteri Besai Brunei Darussalam, Dato Seri Setia Dr Awang Amin Liew Abdullah madah, program nya mandangka pengeransing Sarawak negapka kerejasama bilateral begulai enggau Brunei Darussalam ba mayuh pengawa nyengkaum dagang, dagang temuai, besilih sosiobudaya enggau pemansang ekonomi meruan.
Ku iya, program nya nyadi pelasar pemadu manah nyukung pengerembai Dagang Mit enggau Jelan Pemesai (PKS) ba industri pemakai, ai irup enggau krafjari.
“Program sehari tu mandangka pengeran nyata negapka kaul bilateral entara Brunei Darussalam enggau Sarawak ba mayuh pengawa nyengkaum dagang, dagang temuai, besilih sosiobudaya sereta pemansang ekonomi meruan.
“Citarasa enggau Tautan Budaya Sarawak-Borneo 2025 nyukung orang dagang lokal ngerembai ba industri pemakai, kreatif enggau krafjari,” ku iya.
Iya bejaku munyi nya lebuh bejadika program nya ba Palan Entepan Entukar Stadium Negara Hassanal Bolkiah kena Hari Enam.
Sama datai, Sapit Premier Sarawak Datuk Amar Awang Tengah Ali Hasan enggau bini, Dato Dayang Morliah Awang Daud, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat enggau Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED) Dato Sri Mohd Naroden Majais, Tuai Pegawai Eksekutif STATOB Samat Junai enggau pemesai bukai.
Ku iya, Perintah Brunei Darussalam meda Sarawak ukai semina sama menua ba Tanah Borneo aja, tang bakih strategik ti sama nempa komuniti ekonomi jauh tinjau enggau beretan.
Iya mega nerang, program nya engkeman endar laban diatur seretai enggau Ngintu Hari Pengada Ke bawah Duli Yang Maha Mulia Paduka Seri Baginda Sultan enggau Yang Di-Pertuan Negara Brunei Darussalam, Sultan Hassanal Bolkiah ti ke-79.
“Nya alai, kitai muji STATOB ba pengeransing sida ngatur program Citarasa enggau Tautan Budaya Sarawak-Borneo tu ditu.
“Kitai chukup tekait ati ninga perambu ngangkatka program nya nyadi program ninting taun enggau marit mayuh agi penyereta dudi hari,” ku iya.
Bisi 20 pemandang ari Sarawak enggau 18 ari Brunei Darussalam ngambi bagi ba program diatur ari 2 nyentuk 3 Ogos tu.
Kelimpah ari pemandang pemakai, krafjari enggau produk lokal, pengusung mega diperindang enggau main asal pupu etnik ba Sarawak enggau Brunei Darussalam. - EDISI UKAS
