KUCHING: Sarawak patut diberi autonomi ba sistem nyaga pengerai ngambi ulih numbuhka palan perubat raya ti menyana ba selampur nengeri tu.
Sapit Premier Sarawak, Datuk Amar Profesor Dr Sim Kui Hian madah, pengawa mutar kes raya baka penyakit untak, mati tubuh sepiak, riman enggau patah tulang belakang begunaka perengkaguna ti genap enggau raban pakar mayuh bidang, ti semina ulih dipenyadi nengah perambu enggau belanja belalauka gaya geografi, ukai penyampau tubuh peranak aja.
“Sarawak begunaka palan perubat raya ba tetiap zon besai. Takah 800 kilometer kelalu jauh endur nganjung pesakit ngagai semina siti nya aja palan perubat.
“Kitai begunaka perengkaguna baka CT scan, pakar beputung urat, ortopedik, ICU enggau raban mantu ti genap ba tetiap endur,” ku iya lebuh dirandau pemberita pengudah bejadika Konvensyen Neurosurgeri di Begunan Unit Pekara Pengarap Bukai (UNIFOR), ditu kena Hari Enam.
Iya mega muji pengawa Opis Neurosurgeri Sarawak ti ngerembai mansang kenyau ari 1998 lalu diatu bisi 19 pakar, nyengkaum 15 ti agi gawa ba sektor perintah.
Ngenang silik agi, iya madah ke pengawa Sarawak minta autonomi ba bidang pengerai nya sebagi ari hak ditagih ba Sempekat Malaysia 1963 (MA63) ngambi nengeri tu ulih nentuka empu perambu sistem nyaga pengerai.
“Kitai dekaka kuasa belidar ari Perintah Besai, nyengkaum ari sukut perambu, belanja enggau undang-undang, ngambi kitai ulih ngaduka sebarang pengawa ti diguna rayat Sarawak,” ku iya nyemetak.
Berebak enggau nya, iya madah ke diri irau ke gaya lutur lokal mindah gawa ke menua tasik, kelimpah berati ke sistem pengerai menua ti kelalu ngemeran budaya litigasi baka Amerika Syarikat, ti tau ngasuh ungkus berubat enggau insurans besai.
“Kitai meseti nentuka sistem pengerai kitai bisi ati sinu enggau enda ditating saman enggau begunaka insuran aja.
“Enti perintah ulih bejalaika pangku pengawa nyadi ‘Good Samaritan’ iya nya mantu nadai ngira dibalas, kelebih agi ba penusah ngenyit, tentu rayat deka pechaya agi enggau nerima sistem pengerai kitai,” ku iya.
Konvensyen Neurosurgeri nya ngempuruka bala pakar perubat ari menua tu enggau menua luar, lalu mandangka pengeransing Sarawak ngemansangka penau lokal sereta negapka rentayan profesional ba bidang neurosurgeri.-EDISI UKAS
