KUCHING: Hari Sarawak 2025 patut nyadi awak belemati ke diri ngagai semua Orang Gawa Perintah Sarawak (SCS) nyaga semangat segulai ti nyadi pugu pengering institusyen nya.
 
Sekretari Perintah Sarawak, Datuk Amar Mohamad Abu Bakar Marzuki madah, semangat nya deka terus nyadi pugu pengering SCS diatu, lebih agi betapi enggau penatai artificial intelligence (AI), pendigitalan enggau analitik data.
 
“Ba konteks kemaya hari, penatai AI, pendigitalan enggau analitik data begunaka kitai nyadi orang gawa perintah ti berubah ba chara kitai gawa enggau berunding. Tu beguna endar dikena nyukung agenda pemansang Sarawak seriris enggau pelin pemansang Strategi Pemansang Pengudah Covid-19 (PCDS) 2030.
 
“Nya alai, aku minta semua raban SCS ngemeran prinsip 3R iya nya ‘Revisit, Rethink and Recharge’ dikena nambahka penyikar, kompetensi enggau kapasiti ngambi mereti enggau responsive ngagai ubah enggau diguna kemaya hari,” ku iya ba jaku pesan serimbai Hari Sarawak 2025.
 
Iya mega madah ke diri andal ke semangat penyerakup enggau kerejasama raban SCS, dikena nyapai juluk ngangkatka Sarawak nyadi siti kandang menua ti maju enggau bepenatai pemisi tinggai manggai taun 2030. -EDISI UKAS