MIRI: Raptai penuh Pengerami Ngintu Hari Sarawak 2025 diatur lanchar di Stadium Bandaraya Miri malam tadi.
 
Raptai nya dikemataka Menteri Pengangkut Sarawak ti nyadi Menteri Ngempu Tanggungpengawa Ngintu Hari Sarawak 2025, Dato Sri Lee Kim Shin.
 
Sama datai, Sapit Menteri Pemansang Indu enggau Nembiak Mit Datuk Rosey Yunus, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat, Sapit Sekretari Perintah Sarawak (Operasyen) Datu Hii Chang Kee, Direktor UPPAN Datu Hamdan Sharbini sereta Residen Bagi Menua Miri Galong Luang.
 
Bemacham isi program ti ngemau semangat talukka menua disedia dikena ngerichah pengerami ngintu Hari Sarawak taun tu.
 
Entara batang program nyengkaum video khas Hari Sarawak digembar lagu pengerami pejuluk “Sarawakku Gemilang” sereta video “Sarawak Maju Makmur – A Journey Through Time And Progress” ti deka dibantai pengudah kelai bejadi ti dipenyadika Yang di-Pertua Negeri Sarawak Tun Pehin Sri Dr Wan Junaidi Tuanku Jaafar begulai enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta Dato Sri Lee.
 
Pengerami nya mega deka beperindang enggau Konsert Rayat ari Simfoni Orkestra Negeri Sarawak (SONS) digembar bala artis lokal baka Karen Libau, Raquel Then, Firdaus Materang, Donny Lang, Jali, Noise dream Band enggau Pinomal Band ti betuai ke Fredo, Pinomal Band ti betuai ke Fredo.
 
Bela sama merindang ila Koir Sekula Sekondari (SMK) Pujut enggau Sekula Primari (SK) Lutong sereta tanda ari raban D’Bayu and Cultural Miri, Kumpulan Gah Rentak enggau Culture Art Miri sereta The Art School.
 
Bala penanyi tebilang menua baka Bob Yusof, Dayang Nurfaizah enggau Zee Avi mega deka merindang malam hari pengerami nyadi sebedau diujung enggau bungai api ti bemacham chura kelai pengerichah Hari Sarawak 2025.-EDISI UKAS