MIRI: Pengawa ngatur ‘15th The Gala M.O Sarawak 2025’ ditaga kena 13 September 2025 di Eastwood Valley Golf & Country Club, Miri deka nyadi panggau besai mantaika penau lokal enggau ngelaku industri dagang temuai kreatif nengeri.
 
Datuk Bandar Majlis Bandaraya Miri ti mega Kaban Kunsil Nengeri (ADUN) Pujut, Adam Yii Siew Sang madah, Gala edisyen ke-15 nya chukup besai reti laban setipak enggau ngintu genap taun ke-20 Miri nyadi mengeri besai.
 
Ku iya, semina Miri aja nyadi mengeri endur raun ba Sarawak terus pegari nyadi palan dagang temuai, main asal enggau ngatur program tikas antarabansa.
 
“Pengawa ngatur Gala tu ba Miri endang engkeman sereta nambah pengerichah ngintu genap taun mengeri besai kitai.
 
“Tu ukai semina program sosial aja, tang mega nyadi penyungkak ngagai pemansang industri dagang temuai enggau kreatif nengeri,” ku iya ba aum media khas ti diatur ba Mercure Miri City Centre kena Hari Enam.
 
Ku Adak Yii, Gala M.O Sarawak ti berengkah diatur ba taun 2010 udah ngerembai nyadi entara program sosial enggau main asal pemadu dianti ba Sarawak, ukai semina ulih mantai penau lokal, tang mega ngerami pengelain budaya, pemajik, kreativiti enggau penyerakup rayat.
 
Adam Yii mega bekunsi visyen enggau misyen Gala nya nyadi pelasar negap penau nembiak, ngintu pesaka budaya lokal enggau nyukung sektor dagang temuai kreatif nengeri.
 
Iya mega meri terima kasih ngagai Opis Menteri Dagang Temuai, Industri Kreatif enggau Seni Pemerindang Sarawak sereta semua pemelanja enggau bakih strategik ti udah meri sukung tegut nentuka program mujur.
 
Aum media nya mega mantaika lima ari 10 finalis The Face M.O Sarawak 2025, ti deka nyadi ikon baru ba dunya fesyen, pemajik enggau seni pemerindang nengeri tu.
 
Bala finalis nya deka ngesan pangku pengawa besai ngemujur batang pengerami Gala M.O Sarawak, lalu negapka program tu nyadi penyungkak pemansang modal mensia ba industri kreatif Sarawak.-EDISI UKAS