KUCHING: Pengawa nambah ke penuduk ti deka dibantai di baruh  Rang Undang-Undang (RUU) Kunsil Nengeri (DUN) (Komposisi Keanggotaan) 2025 ba Aum DUN Sarawak, Hari Satu tu deka ngaul Kaban Kunsil Nengeri (ADUN) dulu.
 
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengawa nambah penuduk ADUN patut digaga diatu pemgudah kepenudi diadu 11 taun ti udah.
 
Taja empai digaga ba renggat Parlimen kandang diatu, iya nerangka pengawa nya deka ngerandang jalai ngagai Komiti Besai Pengawa Bepilih (SPR) nentuka sitak adan menua ungkup penuduk Parlimen ti baru.
 
“Sekali tu ukai nambah penuduk Parlimen, tang nambah ba renggat  Sarawak lalu lebuh DUN Sarawak udah ngemendarka nya, ba penemu aku, nitih pematut, Parlimen mega patut ngemendarka nya.
 
“Tu bepanggai ba SPR nentuka dini penuduk tu patut ditambah lalu baka ni ngadu adan nya laban aku pechaya SPR udah bejalaika tungkap sida pengudah Pengawa Bepilih Besai Nengeri (PRN) nyin tadi," terang iya.
 
Iya nerang pekara nya lebuh dirandau pemberita pengudah ngulu Aum Pre-Council serimbai Aum Khas DUN Sarawak, di Indu Opis Parti Pesaka Bumiputera Bersatu (PBB) Sarawak, ditu, kena Hari Enam.
 
Tambah Tuai Pemadah PBB Sarawak nya, penyampau pengundi ti nambah ngenyit kenyau 2018 ngasuh perambu nambah penuduk DUN patut diadu ti udah lama dilanjar.
 
Ngenang engka jurai nya dibai ke Parlimen tumu dalam Ogos, iy nerangka nya agi peragam aja tang nyemetak madah ke perambu nya nipak ke pengawa Sarawak nagih pulai hak ba Sempekat Malaysia 1963 (MA63), nyengkaum nambah penuduk Parlimen.
 
“Aku ngasai ke pekara tu agi peragam jam ke diatu, tang kitai mega udah lama minta penyampau penuduk Parlimen ditambah.
 
“Kitai mega nagih hak kitai ba MA63 diberi pulai lalu pekara tu (tambah penuduk ADUN) engka deperati nyadi siti ari pengawa nuju pengawa nya, laban dikena nambah penuduk Parlimen, tu mega patut nengah pengawa nambah penyampau penuduk ba renggat nengeri," ku iya nyemetak-EDISI UKAS