KUCHING: Pemekuh media ba menua tu diperansang terus nyadi sada rayat, penyaga integriti enggau bakih strategik perintah ba pengawa nempa landskap Malaysia MADANI ti inklusif, bisi etika enggau tan diuji.
Sapit Menteri Besai, Dato Sri Fadillah Yusof madah, Perintah MADANI ransing nempa ekosistem media ti bisi etika enggau ulih beretan.
Ku iya, entara pengawa besai dipejalai iya nya ngaga gazet Akta Majlis Media Malaysia 2024 meri ngerandang jalai ngagai sistem matau kediri (self-regulation) siti sukat penuai runding enggau pengandal ngagai industri.
“Tu ukai semina polisi aja. Tu ngaku pengelelak, integriti enggau pangku pengawa besai kita dalam komuniti,” ku iya nyemetak.
Iya nyebut jaku nya ba Pengerami Makai Lemai Serimbai Hari Pemberita Nasional (HAWANA) 2025 Renggat Sarawak enggau Konferen Media Sarawak (SMeC) 2025 ditu, kena Hari Tiga.
Kelimpah ari nya ku iya, inisiatif baru negapka pemberita nyambil enggau ngati ke diri baka dijaga SOCSO enggau skim i-Saraan KWSP mega dipejalai kelimpah diskaun tambang 50 peratus AirAsia ke menua ASEAN.
Dato Sri Fadillah mega bisi ngenang pasal pemesai guna artificial intelligence (AI) ti ditapat ke industri media kemaya hari, ngaku empas besai ari sukut pengereja nyentuk privasi nyengkaum dunya pemberita.
“Entela hiya. ukai ketegal AI deka nempa dudi hari, tu tau nyadi. Entelah ditu iya nya, sekali ke kitai deka nempa AI, tauka AI ti deka nempa kitai?
“Aku pechaya, ari pemintar semua kitai, ari lebih 600 pemekuh media begempuru malam tu, aku pechaya kitai ulih enggau deka tetapika pemar tu,” ku iya.
Iya mega mai pemekuh media bekenaka AI negapka pengawa nyadi pemberita, seraya ngetan pengawa ti manah, lurus enggau sensitiviti ba dunya pemberita.
Berebak enggau nya, iya madah ke diri temegah meda penau Sarawak ulih ngatur SMeC ti ngempuru pemekuh media enggau ngaga polisi ba siti program randau profesional enggau progresif.
Berebak enggau nya, iya mega ngemendarka agih belanja ngagai Kelab Pengelantang Staf Unit Komunikasi Awam Sarawak (RM25,000), Kelab Belia Azam Bandar Kuching (RM25,000) Serakup Pemberita Bagi Menua Kuching (KDJA) (RM15,000), Serakup Pemberita Utara Sarawak (NSJA) (RM15,000), Serakup Pemberita Sibu (SJA) (RM15,000) enggau Institut Pemberita Rejang (IRJ) (RM15,000).
Sama datai, Menteri Pengangkut Sarawak Dato Sri Lee Kim Shin, Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan, Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya, Sapit Sekrretari Perintah Sarawak (Operasyen), Datu Hii Chang Kee, Direktor UKAS, Awang Putrayusrie Awang Redzuan, sereta temuai dipebasa bukai.-EDISI UKAS
