KUCHING: Etika enggau tanggungpengawa moral ba pemberita, lebih agi lebuh dunya betapi enggau jeman teknologi artificial intelligence (AI) beguna endar dikena nabur penerang ti amat ngagai mensia mayuh.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja AI ulih meri mayuh pemaik enggau sikar, tang pemberita meseti bepegai teguh ba prinsip enggau nilai mensia ti nyadi pugu ngagai profesion nya.
“Pemberitau kai semina ngaga ripot berita ti nyadi laban nya pengawa nadai ngetu ngiga utai ti amat nyadi, mai sada sida ti dikemelu, bepegai ba kuasa bisi tanggungpengawa enggau negapka fabrik sosial ba komuniti kitai,” ku iya.
Iya nibar ke jaku nya lebuh bejadi Konferen Media Sarawak (SMeC) 2025 ti diatur ba siti hotel tebilang ditu, kena Hari Tiga.
Berebak enggau nya, Datuk Patinggi Abang Zohari mega madah ke pemberita kemaya hari ukai semina nusui cherita aja, tang nyaga pengandal mensia mayuh ti beguna endar ngagai demokrasi.
Nya alai, iya minta bala pemberita jeman diatu ulih ngena Ai dikena nambahka kualiti kereja, ukai munas pengawa pugu ti ngangkatka profesion pemberita beguna ngagai demokrasi laban etika tu abstrak.
“Tu datai ari pengasai ati kitai, juluk ti deka dijapai kitai. Nya kebuah, lebuh ngarang enggau ngaga ripot berita, etika tu pekara pemadu beguna.
“Tu pengandal besai orang ti ngaul nuan enggau sida ti dekaka sada sida dibai,” ku iya.
Sama datai, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Sapit Menteri ba Opis Premier Sarawak (Pekara Korporat, Pemadah enggau UKAS) ti nyadi Chairman Pengatur SMeC 2025 Datuk Abdullah Saidol, bala Sapit Menteri Sarawak, Sapit Sekretari Perintah Sarawak (Operasyen) Datu Hii Chang Kee, Direktor UKAS Awang Putrayusrie Awang Redzuan, bala tuai opis sereta temuai dipebasa bukai. -EDISI UKAS
