KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah ke diri nyukung pemansang Artificial Intelligence (AI) ba pelajar di Sarawak.
 
Ku iya, mekuh sistem enggau etika moral maya bekenaka Artificial Intelligence (AI) ba pelajar beguna amat nentuka teknologi nya dikena manah sereta nitih pematut.
 
“Kitai ngatur SMeC 2025 ti meri perati ba pemesai reti enggau etika maya ngena AI ngambi kitai ulih nyeridi nembiak enda salah guna AI.
 
"Kitai meseti ngingat ke sida pasal AI semina mesin ti enda ulih nukar mensia tang kitai ukai mesin, kitai bisi pengasai ati," ku iya.
 
Iya madah munyi ba pengawa bejadi Konferen Media Sarawak (SMeC) 2025, ditu kena Hari Tiga.
 
Dulu ari nya, Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol ngenataika peminta bala pengajar di Sarawak ngambi Perintah Sarawak berunding ngatur program latih khas tauka seminar ungkup semua pengajar ngena AI nyidi chara ngajar ba semua sekula di Sarawak.
 
Ngenang silik, Datuk Patinggi Abang Zohari ba aum pemberita nerang ke pengawa belajar AI ba pelajar beguna endar berindik ari teknologi nya nyadi ‘enabler’ ngagai mayuh pekara nyengkaum dikena ungkup tuju ti enda menuku.
 
“Kitai meseti ngajar sida, AI tu semina siti kereban dikena ngasilka sesebengkah pekara tang nya enda tau dikena ba tuju ti salah.
 
"Baka jaku sempama, kita ngajar orang chara ngena ladin ti betul, ukai senyata dikena munuh.
 
"Nya kebuah, tu moral enggau parameter ngena AI laban enti enda diterang tumu agi, nya ulih dikena nuju pengawa ti salah," ku iya.
 
Berebak enggau nya, iya ngelalau pelajar bekaul teknologi tu mega nyerangkung sukut tanggungpengawa moral ngambi rebak biak ulih ngena teknologi chara pintar lalu ukai semina nyadi kereban teknikal aja. -EDISI UKAS