JOHOR: Dewan Bandaraya Kuching Utara (DBKU) nurai penyulut lebuh dipadu nyadi penerima Anugerah Rosa Sinensis 2025 serimbai Hari Landskap Menua, ti diatur ba Pasir Gudang, Johor kena Hari Enam.
 
DBKU ti keterubah ngambi bagi ba anugerah tebilang diatur Opis Landskap Menua (JLN) nya nempa pemujur lebuh Taman Botani Sarawak diaku entara lima penerima ba kategori taman mensia mayuh.
 
Ku penerang DBKU, dua taman udah dianjung bepekit iya nya Taman Perpaduan, Petra Jaya enggau Taman Botani Sarawak, Kuching, bela mandangka langkar landskap bisi guna, manah ke rampa menua enggau mandangka elemen lokal.
 
“Pemujur tu ukai semina mandangka pengeransing DBKU negapka pemansang landskap bisi kualiti aja, tang nyadi peransang ngerembaika agi pengawa nuju mengeri gadung, meruan enggau lantang nipakka juluk Malaysia Madani enggau Polisi Landskap Menua 2020–2030,” ku penerang nya.
 
Ari 25 penyereta ti diterima ari mayuh agensi enggau organisasyen ba selampur menua, semina lima aja dipilih nyadi penerima Anugerah Rosa Sinensis 2025, iya nya DBKU; Majlis Bandaraya Pasir Gudang; Majlis Daerah Maran; 101 Properties Sdn. Bhd. enggau Setia Frontainer Sdn. Bhd.
 
Pengawa nyua ke anugerah udah dipenyadika Sapit Sekretari Opis Menteri Pengawa Berumah enggau Perintah Lokal, Zulkeflee Sulaiman.
 
DBKU diari ke Direktor, Ramzi Abdillah, begulai enggau Pemangku Sapit Direktor Opis Servis Pemansang enggau Landskap, Maggie Tomeng; Tuai Unit Landskap, Mohamad Benjamin Julaihi Khan; enggau Pengatur Arkitek Landskap, Evie Izzati Bohari.
 
Anugerah Rosa Sinensis nya dikena Opis Landskap Menua ngaku penyulut ba pemansang, pengawa ngatur enggau ngintu landskap bisi kualiti ba Malaysia.
 
Anugerah nya mega nyadi pelasar meransang inovasyen langkar landskap, pengawa ngintu meruan sereta bekenaka elemen gadung lokal ba pemansang landskap menua.
 
Taman Botani Sarawak, ti diintu DBKU, diaku ketegal langkar landskap ti mandangka biodiversiti lokal, sistem ekologi meruan enggau ngena chara setipak enggau rampa menua asal, seraris agenda mengeri gadung enggau pemeruan rampa ngelingi.-EDISI UKAS