BAU: Penanggul bekal ai beresi tejanggal ti majak nyadi ba sitak Jagoi enggau Bratak dalam Pelilih Bau kenyau ari ujung taun 2024 udah nerima perati ari Perintah Sarawak.
 
Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Dato Henry Harry Jinep madah, penanggul nya udah ngeruga pengelantang peranak genturung dia nyengkaum Stass, Serikin, Gumbang, Tringgus enggau kandang ngelingi.
 
“Aku udah ngabas enggau berati ke pengawa benung dipejalaika raban Opis Bekal Ai Menua Pesisir (JBALB),” ku iya ba aum media ti diatur ba Opis Pelilih Bau kena Hari Empat.
 
Iya mega meri terima kasih ngagai raban Opis Bekal Ai Menua Pesisir (JBALB) ti udah ngatur pengawa enggau lengkar, meres paip bumbus, nyeleti, nganjung ai ngagai endur dituntung penanggul sereta ngaga logger dikena matau peneras ai.
 
Iya mega madah ke Perintah Sarawak nengah JBALB udah ngemendarka projek nyeleti paip HDPE pemesai 355mm sepanjai 10.1 kilometer ari simpang lampu trafik Bau ke Stesyen Pam Penjiru.
 
Iya madah, projek nya diatu ba renggat kepenudi nyadika tinda lalu disadang ulih nambahka kapasiti sistem bekal ai sereta mutar penanggul ti udah lama ditapi peranak.
 
“Perintah Sarawak naka ulih mutar penanggul tu enggau lengkas ungkup pengelantang rayat,” ku iya seraya minta peranak ti tusah ketegal penanggul nya terus liat ati enggau meri kerejasama ngagai raban agensi gawa.-EDISI UKAS