KAPIT: sepenyampau 40 projek beungkus RM1.233 bilion benung enggau deka digaga di bagi menua nya, dikena nambah infrastruktur sereta nyungkak sosio-ekonomi rayat dia.
Sapit Premier Sarawak, Datuk Amar Douglas Uggah Embas madah, ari penyampau nya, 19 projek udah tembu lalu lima agi digaga ti beungkus RM116 juta.
Seraya 16 projek da projek beungkus RM721 juta deka ditinda taun tu, ku iya lebuh Bejadika Pengawa Nasih Tanah Jalai Nanga Ibau/ Ulu Sungai Ibau, Kapit kena Hari Empat.
“Projek ti dipenyadi nya beungkus RM99.9 juta ngaul pengawa ngaga jalai sepanjai 12.5km sereta tiga jematan besi enggau perengkaguna bukai, ti ditaga tembu dalam timpuh 36 bulan, ari 5 Mei 2025 nyentuk Mei 2028.
“Tu deka ngelantangka 11 rumah panjai, 219 pintu enggau nyau deka 1,900 peranak nyengkaum akses ke klinik pengerai enggau dua sekula primari,” ku iya.
Menteri Infrastruktur Enggau Pemansang Penyangkai Kapal nya mega ngansak kontraktor enggau Opis Kereja Raya (JKR) nentuka projek nya dipejalai enggau integriti, nitih taga, spesifikasyen enggau bajet.
Iya mega minta projek nya ngena Sistem JKR Project Dashboard sereta atur terit ngagai kontraktor ti puntan.
Datuk Amar Douglas Uggah bisi ngenang pasal pengawa nyeleti jalai batang nyadi rentayan jalai alternatif menua pesisir.
Ku iya, bisi urung 1,273.7 km jalai batang di Kapit ti ulih diseleti.
Seraya Menteri Kereja Raya ti mega Kaban Parlimen Kapit, Dato Sri Alexander Nanta Linggi madah ke pemansang meruan enggau pengeran perintah nengeri chukup beguna dikena negapka komuniti menua pesisir kelebih agi ba Sarawak.
Iya mega bisi ngenang tuju bemacham inisiatif perintah ngemansangka infrastruktur pemun, ngangkat tikas idup rayat enggau negapka ekonomi lolak nengah kerejasama rat entara perintah nengeri enggau Perintah Besai.
Sama datai Sapit Menteri ba Opis Premier Sarawak (Undang-undang enggau Adat Bumiputera) Datuk Jefferson Jamit Unyat, ADUN Pelagus Wilson Nyabong Ijang, Sekretari Mendam Opis Menteri Infrastruktur Enggau Pemansang Penyangkai Kapal Sarawak Datu Chiew Chee Yau, Direktor JKR Sarawak Adj. Prof. Ir. Ts. Gs. Br. PMr. Dr. Cassidy Morris, Sekretari Politik ba Opis Premier Sarawak Watson Awan, Residen Bagi Menua Kapit Elvis Didit sereta bala bukai. - EDISI UKAS
