TIANJIN: Sarawak terus ransing mai visyen industri gadung ke tikas antarabansa ari ngambi bagi ba Aum Ninting Taun World Economic Forum (WEF) New Champions 2025 ti diatur ba Tianjin, China.
Nitih penerang media Opis Menteri Utiliti enggau Telekomunikasyen Sarawak kena Hari Tiga, delegit perintah nengeri betuai ke menteri iya, Dato Sri Julaihi Narawi ti ngari ke Premier Sarawak, lalu nyagu nama Sarawak pegari nyadi nengeri ti ransing ngatur pemansang meruan enggau kuasa gadung dudi hari.
Bela nyempulang Dato Sri Julaihi ba penemuai gawa ke Tianjin iya nya Sapit Sekretari Perintah Sarawak (Perambu Ekonomi enggau Pemansang), Dato Sri Dr. Muhammad Abdullah Zaidel, Sekretari Mendam Opis Opis Menteri Utiliti enggau Telekomunikasyen Sarawak, Datu Jafri Lias, sereta Sekretari Mendam Opis Menteri Kuasa enggau Pemeruan Rampa Menua Sarawak, Datu Abg Ahmad Abg Morni.
Pengawa nya mega negapka pengawa ngaku sejarah lebuh Bintulu diangkat nyadi kluster industri keterubah Malaysia di baruh inisiatif Transforming Industrial Clusters ari Menteri Besai, Dato’ Seri Anwar Ibrahim kena 20 Jun tu tadi.
Pengawa ngaku ari WEF nya mai Sarawak ba jalai besai transformasyen industri ngena inovasyen enggau pemeruan.
Delegit Sarawak mega ngatur randau begulai enggau Tuai Inisiatif Transforming Industrial Clusters WEF, Jörgen Sandström ngambi berandauka pengawa strategik nangkan nya nyengkaum pekara ti deka dibantai Premier Sarawak ti disadang diatur ba WEF Davos taun baru.
“Pengawa ngambi bagi ba inisiatif global tu ukai semina mai Sarawak ba jalai pemeranak puku antarabansa aja, tang mega negapka penuduk kitai nyadi hab industri enggau kuasa dudi hari ti meruan,” ku Dato Sri Julaihi ba penerang nya.
Entara berita besai ba Tianjin nyengkaum randau GUOFUHEE / Asia Energy ti merambu projek eksport hidrogen belai begulai enggau Bintulu Port Holdings Berhad.
Sempekat Pemereti Ati (MoU) deka ditanggam maya International Energy Week 2025 di Kuching, sejarit enggau pejalai Sarawak Hydrogen Economy Roadmap (SHER).
Kelimpah ari nya, atur pengawa begulai mega bisi diatur begulai enggau pemain industri antarabansa baka Jiangxi Tianyuan Environmental Protection Group enggau Qiancheng Group/Comcore Technology, ngaul kerejasama ba teknologi beresi, ngintu teda enggau infrastruktur digital.
Semua nya nipakka juluk Sarawak nyapai pemansang ekonomi gadung ulih beretan nengah Strategi Pemansang Pengudah COVID-19 2030 (PCDS 2030) enggau Sarawak Sustainability Blueprint 2030.-EDISI UKAS
