KUCHING: Kaul entara Perintah Sarawak enggau Kandang Utara Australia terus ditegap enggau pengulih kerejasama ba sektor kuasa ulih dikena baru, nangkap karbon enggau agrobisnes nyengkaum nupi chapi.
 
Menteri Dagang enggau Kaul Asia Kandang Utara Australia Robyn Cahill madah, kerejasama strategik nya nyelinting pemansut asal kelebih agi Tamboran Resource ti diatu ngemansangka projek Beetoloo Sub-Basin ti deka ngeluarka bekal gas.
 
"Pengawa ngeluar belabuh taun baru lalu kami deka berengkah ngasai pemaik dalam taun baru.
 
"Kami endang meransang pemeranak puku enggau inovator ari Sarawak sama ngambi bagi ba pengawa tu begulai enggau kami,” ku iya lebuh bejaku rambau 'Australia's Northern Territory Networking Dinner' ba siti hotel tebilang ditu, kena Hari Tiga.
 
Iya madah baru, Kandang Utara Australia diatu mega meri perati ngagai pengawa nangkap, ngena enggau nyimpan karbon (CCUS) lalu nya peluang bekunsika penemu.
 
Kelimpah ari nya, ku iya, projek solar melepu di Bakun mega narit ati raban sida ti deka dibantai ngagai Menteri Kuasa kandang menua nya.
 
"Sarawak enggau Kandang Utara Australia ngembuan mayuh sejarah ditegi ti sebaka dikena ngulihka mayuh agi kuasa autonomi ari perintah besai.
 
“Pengawa negapka kaul perintah enggau kaul rayat entara dua menua chukup beguna.
 
"Perintah kami baru megai kuasa bulan Ogos taun nyin tadi ti apin genap setaun, tang udah nurai mayuh pemansang.
"Kami benung ngemuntangka proses dagang ba Kandang Utara lalu deka ngangkatka endur nya nyadi pemadu manah ungkup meranak puku enggau kerejasama menua luar.
 
"Kami chukup andal peluang tu bisi begulai enggau Sarawak lalu deka terus negutka tanggam kaul ti udah bisi tu,” ku iya nyemetak.
 
Sama datai ba pengawa nya Sapit Sekretari Perintah Sarawak (Operasyen) Datu Hii Chang Kee. -EDISI UKAS