KUCHING: Kunsil Nengeri (DUN) Sarawak deka ngatur Aum Khas kena 7 Julai tu.
 
Speaker DUN Sarawak, Tan Sri Datuk Amar Mohamad Asfia Awang Nassar madah ke Aum Khas nya berindik ari gerah dikeluar di baruh Peraturan Mesyuarat 8(3), pengudah nerima peminta rasmi ari Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
 
Ku iya, naka diatu empai bisi sebarang Rang Undang-Undang (RUU) diterima ngambi dibantai ba aum nya.
 
“Berindik ari peminta nya, aku udah ngeluarka gerah ngagai semua 82 Kaban Kunsil Nengeri (ADUN) ngambi ngulu Aum Khas ti deka diatur 7 Julai 2025.
 
“Taja pia, nyentuk diatu aku empai nerima sebarang rang undang-undang bekaul, enggau sebarang penerang silik ba pekara tu semina spekulatif aja,” terang iya ba aum media rambau Program Parlimen Mahasiswa Penggal Ketiga Siri 1, ditu Hari Tiga.
 
Tan Sri Datuk Amar Mohamad Asfia mega madah ke mantar pengawa enggau aum media deka diatur pengudah RUU diterima ngambi meri penerang silik senentang batang aum khas nya.
 
Ngenang pasal tanya sekali ke Aum Khas bisi kaul enggau isu ngaga entara baru sitak Kunsil Nengeri enggau Parlimen di Sarawak, ku iya, pekara nya empai ulih dituku seagi empai bisi dokumen rasmi diterima.
 
Taja pia, iya enda ngenggai engka pekara nya tau nyadi.
 
“Sekali ke penyampau penuduk deka nambah tauka kurang, aku enda nemu laban aku apin nerima sebarang RUU.

“Nya alai, aku enda ulih madah silik taja aku bisi ati ngaga baka nya,” ku iya.-EDISI UKAS