KOTA SAMARAHAN: Opis Tanah enggau Survey (JTS), Bagi Menua Samarahan udah ngatur Pengawa Nyua Chek Pemeri Tanggungpengawa Sosial Korporat (CSR) ba Opis Pelilih Sebuyau, Samarahan sehari tu.
 
Program CSR tu ukai semina kelai pengawa aja, tang mandangka pengeransing opis nya gawa ke komuniti, lebih agi mantu genturung pendiau enggau institusyen pelajar ti nyadi pugu pengelantang enggau pemansang komuniti.
 
Lebuh bejaku ba mua mayuh, Tuai Unit Penerit Adat Opis Tanah enggau Survey Sarawak, Thian Choon Kui madah, batang tuju pengawa sehari nya ngerapitka kaul entara peranak dia enggau raban opis lebih agi ba sitak Pelilih Sebuyau.
 
Kelimpah ari genturung pendiau, pemeri nya mega diberi ngagai sekeda sekula ke bisi ba Pelilih Sebuyau.
 
Bisi 5 genturung pendiau enggau 4 sekula nerima pemeri bela penyampau RM10,000 lalu semua pemeri manggai RM90,000.
 
Entara genturung pendiau nerima pemeri iya nya Kampung Baru Sebuyau, Kampung Baru Hilir Sebuyau, Kampung Hulu Sebuyau, Kampung Masjid enggau Kampung Giatmara.
 
Seraya sekula ti ampit nerima chek iya nya SK Tuanku Bagus, SJK Chung Hua Sebuyau, Taska Permata KEMAS Sebuyau enggau SMK Sebuyau.
 
Iya mega ngarapka pemeri nya ulih dikena ngintu pengelantang, ngatur pemansang infrastruktur pemun, mantu nembiak tauka diguna ba pekara bukai ti patut.
 
Sama datai, Penguasa Tanah enggau Survey Bagi Menua Samarahan, Mohammad Zunica Mohamad Sapi’ee, Melor Buyong ngari ke Pegawai Pelilih Sebuyau enggau Bangit Grunsin, Head of Quarries SEDC.-EDISI UKAS