KUCHING: Siti ari segmen ba Program Outreach Unit Komunikasi Awam Sarawak (UKAS) - Info Fun with UKAS – nyadi pelasar mai ‘sada’ nembiak kemaya hari, lebih agi nembiak ngagai baka tuai kanan ba Perintah Sarawak.
 
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, rampa belajar kemaya hari enda ulih ngenggaika bida jeman suba, ke alai bisi sekeda peneka enggau ‘sada’ baru bala nembiak ti patut diperunding.
 
Berindik ari nya ku iya, UKAS nyadi siti ari raban pemadah Perintah Sarawak ngatur program baka nya ngambi sada bala nembiak ba kandang menua tu ulih dibai ngagai bala tuai kanan, lalu ngiga chara ngambi tetangkupka ‘sada’ peminta baru sida.
 
“Inisiatif Perintah Sarawak ukai semina ari atas ke baruh aja, ukai semina perintah ti ngatur polisi tang kami ba renggat perintah mega deka ninga sada kitai nyengkaum utai diguna bala nembiak ba Sarawak dudi hari ngambi bala tuai diatu ulih nusun tauka ngaga formula ti efisien agi, senutuk ‘sada’ peneka rebak dudi,” ku iya.
 
Iya nyebut jaku nya ba mua mayuh rambau pengawa nangguh Info Fun with UKAS ditu, kena Hari Dua.
 
Kelimpah ari mai sada nembiak, Datuk Abdullah nerangka program Info Fun with UKAS mega nyadi nalan bekunsi inisiatif Perintah Sarawak, sereta nerima timbal penemu ari bala nembiak pasal pengawa perintah kelebih agi ba sektor pelajar.
 
“Semua peminta tauka sada kita diatu deka dirikod enggau dibai kami ngagai bala tuai atas din.
 
“Nya alai, bala nembiak diatu patut bekunsi tuju, juluk tauka pengirau enggau sebana semua nembiak ba sebarang alai,” ku iya madah baru.
 
Sama datai, Tuai Pegawai Eksekutif TEGAS Digital Village Udin Bujang, Sapit Direktor UKAS Mohamed Faizal Shah Ali, Tuai Unit Pekara Korporat Opis Menteri Pelajar, Inovasyen enggau Pemansang Penau Sarawak (MEITD) Surayah Morshidi, Sapit Direktor Unit Pelajar Yayasan Sarawak Watson Chuggat Leonard Doo, sereta temuai dipebasa bukai. -EDISI UKAS