KATIBAS: Perintah Sarawak terus ransing ngaku enggau negapka tanah Adat Bansa Asal (NCR) nengah program Randau Nyukat Kelingi Tanah NCR Seksyen 6 ngena Akta Kanun Tanah Negeri (KTN) ba sitak Sungai Bangkit, Katibas.
 
Program diatur Opis Tanah enggau Survey (JTS) Bagi Menua Kapit nya diatur ba Rumah Sebastian Tambi, Nanga Bangkit, kena Hari Dua, mujur ngempuruka lebih 200 peranak dia sereta bala tuai komuniti ari 24 Komiti Pemansang enggau Pengelikun Pendiau (JKKK) sitak Katibas Tengah.
 
Lebuh bejaku bejadi program, Kaban Kunsil Nengeri (ADUN) Katibas, Lidam Assan nyemetak madah ke pengawa nyukat Seksyen 6 beguna endar dikena ngaku tanah NCR diempu komuniti.
 
 “Seagi tanah nadai pala, nya empai diempu ti diaku undang-undang.
 
“Pengawa nyukat tu kunchi kitai ngempu tanah, lalu aku minta peranak meri kerejasama rat ngagai Opis Tanah enggau Survey,” ku iya.
 
Iya mega nangkan entara tanah patut diputar manah enggau belalauka adat ari iring tuai komuniti ngambi enda ngachau pengawa nyukat.
 
“Kitai patut bebatak asur enggau nyeliah penyarut. Enti bisi tanah ti kena kelaung pengudah nyukat Seksyen 6, kita tau minta nengah Seksyen 6A Domain Wilayah Pribumi (NTD) ngambi nambahka pemesai NCR,” ku iya madah baru.
 
Superitenden JTS Kapit, Sagu Unting, lebuh meri penerang teknikal madah ke bisi 11,417 hektar tanah deka disukat ba sitak Sungai Bangkit ngaul genturung Rumah Selikau, Batu Labang, Makut enggau genturung sepemanjai Sungai Bangkit.
 
Ku iya, bisi empat kompeni udah dipadu bejalaika pengawa nyukat iya nya Borders Survey Consultant Sdn. Bhd; Geo Survey Consultant; Survey Development Survey enggau Ace Geomatic Sdn. Bhd.
 
“Pengawa nyukat Seksyen 6 ngambi entara tanah NCR enggau tanah perintah sereta sitak betebangka kayu udah dibagi.
 
“Tu pengawa keterubah sebedau Seksyen 18 ti deka meri pala tanah ngagai individu,” terang iya.-EDISI UKAS