KUCHING: Sarawak enggau Kandang Utara Australia bisi juluk negapka kaul begulai nengah kerejasama strategik ba bidang kuasa ulih dikena baru, dagang temuai, pelajar enggau pemansang ekonomi serantau.
Menteri Dagang enggau Kaul Asia Kandang Utara Australia, Robyn Cahill madah, kededua kandang menua nya ba tikas pemansang ekonomi ti nyau deka sebaka enggau bekunsi mayuh pengulih lebih agi ba pengawa ngintu rampa menua enggau meranak puku kuasa meruan.
“Siti peneleba ti chukup besai reti ditu sehari tu begulai berandauka peluang kerejasama Kandang Utara enggau Sarawak, ngemansangka ekonomi kitai, ngemansangka industri dagang temuai enggau pemadu beguna, berati baka ni kitai ulih negap kaul kededua kandang menua,” ku iya.
Iya bejaku munyi nya ngagai pemberita pengudah baum begulai enggau Sapit Premier Sarawak, Datuk Amar Awang Tengah Ali Hasan ba Wisma Sumber Alam, ditu, sehari tu.
Delegit Australia ti betuai ke iya empu mega disempulang sekeda pegawai kanan nyengkaum Tuai Staf Brett Hannam, Sapit Tuai Pegawai Eksekutif Opis Dagang enggau Kaul Asia Kelly Ralston, sereta Direktor Study NT Renee Tennent.
Bela ngulu aum nya Sapit Menteri Dagang Antarabansa, Industri enggau Meranak Puku, Datuk Dr. Malcolm Mussen Lamoh enggau Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh.
Aum nya meri perati ngagai pengawa kerejasama baka pemansang penau enggau pelajar tinggi, industri minyak enggau gas, dagang temuai eko, luyang gadung sereta jamin bekal pemakai enggau betanam betupi.
Sarawak mega madah ke diri bisi ati belajarka pengawa pemadu manah Australia ngintu taman negara enggau pengeraja asal.
Kededua raban ransing negapka agi kaul dagang enggau meranak puku, enggau Australia ngaku Malaysia nyadi pemansut kedua pemadu besai import ungkup Kandang Utara.
Penemuai gawa delegit nya pengelama empat hari ba Sarawak disadang ngerandang mayuh agi peluang kerejasama dudi hari ungkup penguntung ekonomi enggau rampa menua kededua kandang menua.-EDISI UKAS
