MULU: Pengerami Ngiling Bidai diatur raban Nembiak Parti Pesaka Bumiputera Bersatu (PBB) Pampang Mulu begulai enggau Komiti Pemansang enggau Pengelikun Genturung Pendiau  (JKKK) Rumah Gawong Sungai Selejau Asal Marudi mujur ngempuru lebih 70 peranak ari ngelingi sitak Puyut enggau Lubuk Nibung ba siti pengerami penuh adat enggau bebaik kena Hari Enam.
 
Tuai Nembiak PBB Pampang Mulu, Cyril Kuling, lebuh bejaku bejadi pengerami meri terima kasih ngagai Sapit Menteri ba Opis Premier Sarawak (Pengereja, Imigresyen enggau Patau Projek) ti nyadi Tuai Pampang PBB Mulu, Datuk Gerawat Gala, udah meri sukung tegut ngagai pengawa ngatur pengerami nya.
 
Iya mega madah, Ngiling Bidai ukai semina dikena nutup Gawai aja, tang pelajar negapka nilai pengawa asal, pemanah ulah enggau semangat komuniti.
 
Iya mantangka jaku rebak biak nya penyulur enggau deka nyadi tuai dudi hari, nya alai sida patut mereti enggau nemu pasal pesaka budaya kediri empu.
 
Pengerami Ngiling Bidai nyadi entara aktiviti ninting taun raban Nembiak PBB Mulu ba pengawa ngerichah hari besai komuniti dia sereta ngidupka baru semangat beduruk enggau beserakup entara rebak tuai enggau biak. -EDISI UKAS