SARATOK: Perengkaguna penyambung peranak menua pesisir Saratok deka ngasai transformasyen besai lebuh projek ngaga Jalai Kampung Kupang ke Simpang Bajau sepanjai 19.8 kilometer, beungkus RM112.9 juta, diatu benung digaga lalu disadang tembu September 2027.
 
Pengawa nasih tanah projek besai empas nya udah dipenyadika Sapit Menteri Besai Malaysia, Datuk Patinggi Dr Ahmad Zahid Hamidi ba Rumah Rengan Selambong, Saratok, kena Hari Minggu ti bela digulu lebih 1,000 peranak dia.
 
Ku Datuk Patinggi Dr Ahmad Zahid, pejalai projek nya mandangka perintah naka ulih nentuka pemansang sebela ba selampur menua, lebih agi ba kandang menua pesisir.
 
“Kerejasama rat entara Perintah Besai enggau Perintah Sarawak nyadi kunchi ngedut takah pemansang menua pesisir.
 
“Projek baka tu mandangka penyiru perintah nangkup peminta rayat ba menua ulu,” ku iya.
 
Iya madah baru, lebuh tembu ila, jalai nya deka ngemuntangka jalai penyambung peranak Kampung Kupang ke Pasar Saratok, lalu meransang ekonomi menua nya tumbuh sereta nambah akses perengkaguna pemun.
 
Projek nya mega ngaul pengawa ngaga lima jematan mit enggau sekeda simpang jalai ke rumah panjai semak dia, lalu diatu benung lanchar digaga nitih taga.
 
Ba pengawa ke sama, iya bisi ngemendarka projek ngaga jematan baru ari Kampung Kupang ke Pasar Saratok ti dipelaba beungkus RM122 juta.
 
Jematan nya deka ngemandakka pejalai ari Kupang ke Saratok kelimpah marit pemansang ngagai kandang menua ngelingi.
 
Sama datai, Sapit Menteri KKDW, Datuk Rubiah Wang; Sapit Menteri Infrastruktur enggau Pemansang Penyangkai Kapal Sarawak, Dato Majang Renggi; Tuai Sekretari Politik Premier Sarawak, Dato Fazrudin Abdul Rahman; Senator Pele Peter Tinggom; Kaban Parlimen Batang Lupar, Mohamad Shafizan Kepli; ADUN Kalaka, Mohamad Duri; ADUN Beting Maro, Razaili Gapor enggau ADUN Krian, Friday Belik.
 
Projek nya mandangka siti da pengeran perintah negapka pemansang infrastruktur menua pesisir ungkup pengelantang rayat Sarawak.-EDISI UKAS