BAU: Sapit Menteri Pengangkut Sarawak (Sungai denggau Tasik), Dato Henry Harry Jinep madah ke diri keran negapka infrastruktur pengarap enggau pemun ba Zon Jagoi.
Kaban Kunsil Nengeri (ADUN) Tasik Biru nya nyemetak madah ke pengawa ngenegapka perengkaguna gerija enggau utai diguna pemun komuniti menua pesisir terus nyadi agenda besai iya.
Nya alai iya ngemendarka tiga gerija ba Zon Jagoi diseleti diatu baka Gerija St Leo di Serasot, Gerija St Lucas di Duyoh enggau Gerija St Francis Xavier ti nyadi sebagi ari pengawa iya nentuka rumah sembiang ba menua pesisir terus nerima perati ari sukut nyeleti struktur, penyikap enggau pengelantang.
Iya nyebut jaku nya ba Pengerami Makai Serumpu Gawai Renggat Paroki St Stephen 2025, ditu, kena Hari Enam.
Ngenang pasal pekara ti benung nanggul rayat, iya madah ke penanggul ai lubah niki enggau bekal suah tejanggal ti kamah ketegal diesel ba Palan Meresi Ai Batu Kitang.
Ngeleda ke empas besai penanggul nya ba pengidup besehari-sehari nyengkaum aktiviti pengarap, iya minta timpuh seminggu endur mutar begulai enggau agensi bekaul sereta merambu ngaga paip alternatif ke sitak Jagoi.
“Enti bisi dua sistem bekal ai, dia bekal agi deka tegap agi lalu penanggul ulih ditagang,” ku iya.
Ngena peluang nya, iya mega ngemendarka projek ngaga sambung sistem aricon ba Gerija
St. Mark ngena ungkus RM150,000 nengah Program Transformasyen Menua Pesisir (RTP) taun 2026, dikena nambah pengelantang bala ti sembiang kia.-EDISI UKAS
