BINTULU: Kaban Kunsil Nengeri (ADUN) Jepak, Iskandar Turkee meri jamin nadai bechiping mantu rayat, nadai ngira penemu politik, raban bansa enggau jalai pengarap.
 
Ku iya, isu rumah panjai tuduh, jalai jai, penanggul bekal ai enggau kuasa karan deka terus diberi peratu ba pengawa mantu rayat ba sitak dipegai iya.
 
“Aku enda nanya sapa ti nyukung aku. Aku semina nanya nama utai diguna kita,” ku iya ba Pengerami Ngiling Bidai diatur Parti Pesaka Bumiputera Bersatu (PBB) Jepak ditu, kena Hari Enam.
 
Berebak enggau nya, iya madah pengerami Ngiling Bidai ukai semina lambang nutup Gawai aja, tang mai reti besai agi pasal penyayau enggau ngempung komuniti.
 
Iya madah, sekumbang Gawai diintu, iya empu ngundang peranak ari rumah panjai ke rumah panjai siti, ukai nyadi pengari rayat aja, tang nyadi anak, kaban belayan enggau bakih.
 
Nya alai, Iskandar meri jamin pengerami baka nya deka ditandu ninting taun nyadi pelasar penyerakup rayat Jepak. -EDISI UKAS