SIMUNJAN: Perintah Gabungan Parti Sarawak (GPS) seruran naka ulih nentuka pemansang menua pesisir enggau pengelantang komuniti terus dikenati.
Kaban Parlimen Batang Sadong, Rodiyah Sapiee madah, Perintah Sarawak meri perati ngagai pekara pelajar, infrastruktur, ekonomi sereta negap rebak nembiak enggau indu, lebih agi ba kandang menua pesisir.
Iya mega minta rebak biak ngena manah peluang nampung pelajar ngagai tikas tinggi agi, lebih agi ba pelajar pechuma ti deka disedia Perintah Sarawak belabuh taun baru ba universiti diempu Perintah Sarawak.
“Rebak biak lokal mega patut regas agi ngaul diri ba pemansang ekonomi nengeri ti benung deras ngerembai ti enda ngiar penemu pasal politik lokal.
“Baka ti dipeda kitai diatu, puji tuhan, geladak ruai rumah panjai 46 pintu udah tembu ditile magang.
"Projek tu dipejalai ngena agih belanja Program Nyeleti Rumah Mesekin Sarawak (PPRMS) enggau ungkus manggai RM110,400,” ku iya.
Iya nyebut jaku nya ba Pengerami Ngiling Tikai Gawai Dayak di Kampung Ensengei Iban Baru enggau Kampung Ensengei Iban Lama, kena Hari Enam.
Ngenang pengerami nya, Rodiyah mega madah ke Gawai diintu ukai semina pengerami main asal aja tang lambang penyerakup enggau terima kasih kelimpah nyadi nalan negut kaul diri sebilik sereta bebasa ba komuniti pupu bansa.
Rodiyah mega ngaku pangku pengawa besai komuniti Dayak nyungkak pemansang Sarawak, enggau sitak Simunjan.
“Kerejasama ti ditunjuk ari sukut sosial, ekonomi enggau politik chukup manah lalu aku pechaya ari semangat inklusif tu, kitai deka terus nyingkang maju sebela,” ku iya.
Kelai pemujur projek nya, Rodiyah enggau Kaban Kunsil Nengeri (ADUN) Simunjan, Awla Dris bela bejadi ruai enggau tile baru, serete ngelai pengeran perintah ngangkatka tikas pengidup peranak rumah panjai.
Pengerami nya mega richah enggau pengawa asal Ngetas Ranyai, kelai nutup Gawai Dayak ti bela dipenyadika seduai ngena adat enggau budaya.
Sama datai, bini Awla, Napsiah Abang Kaderi; Pegawai Pelilih Simunjan, Sanuyah Mohamad, Pemangku Sekretari Kaunsil Pelilih Simunjan, Sabli Razak; Tuai Polis Pelilih Simunjan, DSP Rafhan Kepli, Penghulu Sitak Zon Pangkor, Musa Pozi, Tuai Rumah Kampung Ensengei Iban Baru, Minchong Pakal sereta Tuai Rumah Kampung Ensengei Iban Lama, Muda Bujang.-EDISI UKAS
