KUCHING: Sarawak deka nurai siti da pemujur ba pengawa ngemansangka ekosistem kuasa beresi enggau meruan ari muka stesyen PETROS Kuasa Mayuh Bansa tauka “Multifuel Station” (MFS) Ke-11 di Batu Kawa enda lama da.
 
MFS Batu Kawa nya mega nyadi stesyen “flagship” kedua di nengeri ti ulih nyendiaka bekal gas hidrogen.
 
Berita nya dipadah SEDC Energy (SEDCE) berindik ari penemuai gawa Sapit Premier Sarawak, Datuk Amar Profesor Dr. Sim Kui Hian ke taba projek kena Hari Minggu, ke alai iya diberi penerang pasal pejalai kereja enggau petemba perengkaguna nya.
 
SEDCE ba siti penerang media sehari tu madah, struktur fizikal stesyen udah tembu lalu diatu ba renggat kepenudi nyeraris enggau raban bekuasa matau sebedau ngepunka operasyen.
 
“Stesyen tu deka nyadi komponen beguna ba rentayan ngisi hidrogen Sarawak, nyukung aspirasyen nengeri nuju kuasa ulih dikena baru,” ku iya.
 
MFS Batu Kawa digaga ngena konsep mayuh bansa (multifuel) ti mungkur minyak konvensional, pengechas deras entukar elekterik (EV) enggau ngisi hidrogen.
 
Nya deka nerima bekal hidrogen ari stesyen flagship keterubah, MFS Darul Hana, ti ngembuan loji ngeluar hidrogen ba taba ngembuan kapasiti 150kg.
 
Moden nganjung bekal hidrogen ari Darul Hana ke Batu Kawa deka ngena sistem ngisi ulih mindah “Mobile Hydrogen Refuelling System” (MHRS) nengah pengangkut treler tiub, siti chara keterubah baka nya di randau tu.
 
Ba pengawa ngenegapka ekonomi sosial, SEDCE mega udah nyiri Gerempung Kerejasama Bomba enggau Penyah Penusah Malaysia (KOBOPEM) nyadi operator MFS Batu Kawa ti meri penatai pemisi meruan ngagai bala kaban gerempung.
 
Nyadi anak kompeni PETROS, SEDCE ngesan tanggungpengawa besai ngemansangka rentayan nilai hidrogen enggau dagang ili minyak enggau gas renchit di Sarawak ngena chap PETROS MFS.
 
Naka diatu, 10 stesyen MFS udah bejalaika operasyen ba selampur nengeri, nyengkaum MFS Darul Hana (Jalai Tun Salahuddin), MFS Daro (Jalai Matu-Daro), MFS Kanowit (Jalai Kubu), MFS Kuala Matu (Jalai Daro–Kuala Matu), MFS Brooke Drive (Sibu), MFS Selangau (Pan Borneo-Selangau), MFS Tatau (Pan Borneo-Tatau), MFS Kapit (Jalai Bleteh), MFS Sungai Asap (Jalai Bintulu-Bakun) enggau MFS Jepak (Kampung Jepak).
 
Kelimpah ari Batu Kawa, empat da stesyen flagship benung dilanggur ba Sri Aman, Sibu, Bintulu enggau Miri sereta ba Bintulu (Jalai Sultan Iskandar) ditaga belabuh tengan kedua taun tu.
 
Stesyen “flagship” tu disadang nyadi tulang belakang ngagai rentayan ngisi hidrogen Sarawak, lebih agi ba mengeri besai.
 
Seraya ti da stesyen benung digaga, enggau lebih 40 taba dikelala enggau dilanggur ungkup pemansang ba selampur nengeri.
 
Semua stesyen baru tu deka disikap perengkaguna ngechas EV kelimpah nyendia minyak konvensional, seriris enggau pengawa ngerembaika kuasa beresi ngagai rayat Sarawak.-EDISI UKAS