SIBU: Pengeransing Kaban Kunsil Nengeri (ADUN) Tamin, Ir. Christopher Gira Sambang ngenegapka pelajar ba sitak nya ditampung nengah pengawa meri agih belanja sepenyampau RM300,000 ngagai Sekula Sekondari (SMK) Luar Bandar No. 1 Sibu.
 
Iya ngemendarka berita manah nya lebuh bejadika Aum Besai Serakup Apai Indai enggau Pengajar (PIBG) SMK Luar Bandar No. 1 Sibu Ungkup Taun 2025 kena Hari Lima.
 
Ku iya, belanja Program Transformasyen Menua Pesisir (RTP) nya deka dikena ngaga gelanggang mayuhguna beperabung, ti deka dikena ungkup aktiviti main enggau lumba, kokurikulum enggau pengawa bebatang sekula.
 
“RM30,000 nengah Projek Pemansang Mit Menua Pesisir (MRP) ngagai PIBG SMK Luar Bandar No. 1 Sibu dikena bejalaika program pemansang nembiak enggau pengelantang sekula.
 
“Tu ukai semina projek fizikal aja, tang pengawa meranak puku timpuh panjai dikena nempa nembiak ti sebela – ari sukut akademik, manah ulah enggau regas,” ku iya.
 
Ir. Christopher Gira mega meri perati ngagai sekeda isu bukai ti ditapi sekula, baka penanggul ai lubah niki ti deka dibai ngagai Sibu Water Board (SWB) ngambi diputar lengkas.
 
“Isu bungkur internet ti lemi mega ngachau pengawa belajar digital enggau bejalaika program sekula udah dibai ngagai Sarawak Multimedia Authority (SMA) enggau opis menteri bekaul ngambi dikemanah.
 
“Akses Internet ukai semina perengkaguna tambah aja, tang diatu utai ti pemadu beguna ba pelajar,” ku iya nyemetak.
 
Iya mega bisi nyebut pelajar nya pugu pemansang modal mensia, lebih agi ba kandang menua pesisr.
 
Pengerami nya richah enggau sekeda program ti mandangka pengeregas nembiak enggau ngaku nembiak ti nyulut.
 
Bela disua setipikit ngenang jasa Kaban Komiti PIBG penggal 2023/2025 kelai terima kasih ke pemanah pengawa sida.
 
Nya nyengkaum nyua Anugerah Nembiak Nyulut ba SPM enggau STPM taun 2023/2024 ti disua Ir. Christopher Gira empu. - EDISI UKAS