KUCHING: Penatai Duli Yang Teramat Mulia (DYTM) Tuanku Syed Faizuddin Putra Ibni Tuanku Syed Sirajuddin Jamalullail, Raja Muda Perlis enggau DYTM Tuanku Hajah Lailatul Shahreen Akashah Khalil, Raja Puan Muda Perlis ngerichah malam mungkal Festival Muzik Kampung Ujan Sedunya (RWMF) 2025 di Kampung Budaya Sarawak (SCV), malam tadi.
 
Penatai seduai urung pukul 8.40 malam disambut penuh basa Menteri Dagang Temuai, Industri Kreatif Enggau Seni Pemerindang Sarawak, Dato Sri Abdul Karim Rahman Hamzah enggau bini, disempulang sapit iya, Dato Gerald Rentap Jabu enggau bini.
 
Ba pengerami chukup richah ngaul budaya nya, seduai meda pemerindang ari bala artis lokal sereta antarabansa nyengkaum Mathew Ngau Jau begulai enggau Lan E Tuyang, The Paradise Bangkok Molam International Band (Thailand), Naugan (Malaysia), Gaga Gundul (Perancis enggau Indonesia), Seffarine (Maghribi, Cuba, Sepanyol, Amerika Syarikat enggau Iran), Otyken (Siberia, Rusia), enggau Meruked Ari Sarawak.
 
Penatai seduai nyata ngerichah bala pengusung ti sama datai meda, sereta nambahka pengerami malam nya.
 
Seduai mega ditaga datai meda pengawa bejalai bebala mayuh Gawai Dayak 2025 ti deka diatur kena hari enam di Square Tower, Tebing Sungai Sarawak, Kuching.
 
Lebih 10,000 pengusung nedat SCV ti meda malam mungkal RWMF ngena sulu jaku ‘Connection – One Earth, One Love’, enggau bemacham pemerindang, aktiviti main asal, sereta pemakai lokal ti ngasuh tetenguk.
 
Sama datai ngerichah malam nya, sapit menteri ba opis Premier Sarawak (Pengereja Kasar, Imigresyen enggau Patau Projek), Datuk Gerawat Gala; Kaban Kunsil Nengeri (ADUN) Telang Usan ti nyadi Chairman Kaunsil Dagang Temuai Sarawak, Dato Dennis Ngau sereta bala temuai dipebasa ke bukai.