SANTUBONG: Semilan ari 10 apai ba menua tu ngaku betapi enggau pemar bejalaika tanggungpengawa nyadi tuai ruang bilik, kelebih agi ba rampa dunya moden ti disungkak teknologi enggau digitalisasyen kemaya hari.
Menteri Pemansang Indu, Ruang Bilik enggau Komuniti Dato Sri Nancy Shukri madah, bemacham pekara meri penguji ngagai bala apai, baka belanja idup ti niki, tating kereja, pengirau ke pengidup diri sebilik dudi hari sereta tusah magi jam entara kereja enggau diri sebilik.
“Semua tu suah enda dipeda ngena mata kasar. Mayuh apai diau ngatika diri maya ngesan penguji lalu naka ulih magi jam entara kereja enggau sida sebilik.
“Ba dunya digial kemaya hari, sida mega ngesan tanggungpengawa nyadi chunto enggau ngembing bala anak napi pemar dunya ti mayuh penguji,” ku iya.
Iya nibar ke jaku nya ba Pengawa Bejadi Kem Kapten Ruang Bilik Serimbai Hari Apai 2025 ti diatur di Damai Escape Park, ditu, kena Hari Minggu.
Ngenang silik agi, Dato Sri Nancy madah ke opis menteri sida nengah Kaunsil Peranak enggau Pemansang Ruang Bilik Menua (LPPKN) bisi nyendiaka Modul Apai Indai dikena mantua pai indai mutar pemar maya nyeridi enggau ngemesaika bala anak.
Kaban Parlimen Santubong nya mega minta apai indai terus regas nempa rebak dudi hari ti nyulut agi.
“Semua ulah enggau pengawa apai indai besehari-sehari deka ditunda bala anak. Nya kebuah, seliah ngena jaku negatif ba ruang bilik laban nya deka malut ulah enggau pengawa bala anak,” ku iya.
Pengawa nya bela richah enggau bemacham aktiviti ngaul diri sebilik ke alai apai indai enggau anak ngambi bagi, lalu negap pangku pengawa apai nyadi ‘kapten besai’ bar uang bilik. – EDISI UKAS
