SANTUBONG: Perintah sekali ke Perintah Besai tauka nengeri deka terus nyaup nembiak mutar penanggul kusut runding maya belajar ngambi enda kelalu teguran ti tau ngenusah diri enggau sida sebilik.
 
Menteri Pemansang Indu, Ruang Bilik enggau Komuniti Dato Sri Nancy Shukri madah, raban sida udah bejalaika bemacham program nyengkaum program advokasyen ngaul bemacham agensi perintah.
 
Iya nerang, nya kelebih agi pemesai guna ninga penemu ari orang sebilik, bala bakih tauka orang semak sida nya.
 
“Bisi pekara ti enda ditemu kitai pasal nembiak ti kusut runding tu nyentuk ninga penemu ari orang semak sida.
 
“Bisi ketegal pengerindu, bisi mega ketegal penanggul ekonomi enggau belanja, ti ngasuh semua tu patut diputar lalu kami ditu nyaup nengah program ti bisi,” ku iya.
 
Iya nyebut pekara nya ba aum media pengudah Kapten Ruang Bilik Serimbai Hari Apai 2025 di Damai Escape Park ditu, kena Hari Minggu.
 
Nambah ke nya, Kaban Parlimen Santubong nya meransang bala nembiak seruran ngaul diri enggau bebakih ngambi sida bisi endur mantaika sebana tauka minta sanding penemu.
 
 Seraya enti sema napi penanggul ba belanja ku iya, Perintah Besai tauka nengeri mayuh meri bantu belanja dikena mantu bala nembiak.
 
“Enti ba Sarawak, mayuh bantu ungkup nembiak enggau komuniti ke alai tebal agi diberi Perintah Sarawak.
“Nya alai kitai ngarapka sida ngeleda lalu berandau enggau bala bakih, bejaku enggau diri sebilik taika orang ti lantang enggau begulai,” terang iya. -EDISI UKAS