LIMBANG: Pengerami Sembiang Makai Selamat Hari Pengada Kebawah Duli Yang Maha Mulia Seri Paduka Baginda Yang di-Pertuan Agong ke-17 diatur enggau penuh berekat ba Masjid Jannatul Firdaus, ditu Hari Lima.
 
Penatai Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi urung pukul 6.20 lemai ngerichahka agi pengerami nya.
 
Pengerami dipun enggau azan sereta Sembiang Fardu Maghrib bebala mayuh, dientudi bacha Surah Yaasin enggau Sembiang Makai Selamar ti betuai ke Imam Besai Sarawak, Sahibul Fadhilah Dato Mustapha Kamal Ahmad Fauzi.
 
Pengerami lemai nya mega diperindang enggau zikir marhaban ari Gabungan Kumpulan Zikir Bagi Menua Limbang ti mai bala mayuh mereti ke agi pemesai reti beterima kasih.
 
Seraya Tun Pehin Sri Dr. Wan Junaidi enggau bini ditaga ngulu Pengawa Ngirup Teh serimbai ngintu Hari Pengada Yang di-Pertuan Agong ke-17 di Dewan Suarah Limbang kena Hari Enam.
 
Sama datai, Speaker Kunsil Nengeri Sarawak, Tan Sri Mohamad Asfia Awang Nassar, Menteri Pelajar, Inovasi enggau Pemansang Penau Sarawak ti nyadi Menteri Megai Tanggungpengawa Ngintu Hari Pengada Yang di-Pertuan Agong ke-17, Dato Sri Roland Sagah Wee Inn, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Sapit Menteri ba Opis Premier Sarawak (Penyeraris Projek Ungkup Agensi Pemandang Kandang Menua, DBKU enggau Pekara Islam), Datuk Dr Abdul Rahman Junaidi, Sapit Menteri Industri Pemakai, Komoditi enggau Pemansang Kandang Menua Sarawak (Industri Pemakai), Datuk Abdul Rahman Ismail, Sapit Menteri ba Opis Premier Sarawak (Integriti enggau Ombudsman), Dato Dr Juanda Jaya,  Sapit Menteri Pengangkut Malaysia ti nyadi Kaban Parlimen Limbang, Datuk Hasbi Habibollah, bala tuai opis enggau peranak Limbang ke bukai.-EDISI UKAS