KUCHING: Panggau drama muzikal epik Rentap: The Battle of Bukit Sadok ngasuh bala ti datai tebelenga lebuh meda kelulu chukup manah ti diatur di Kampung Budaya Sarawak ditu kena malam Hari Enam.
 
Narit ati agi, bala mayuh tumu nedat endur nya urung pukul 6 lemai deka meda kelalu sejarah nya ti ngangkatka kisah bujang berani legenda Sarawak nya.
 
Ngangkat ke kisah pemerani bujang berani legenda Iban, Rentap, drama muzikal nya dipeda mujur ngemau semangat penaluk rayat Sarawak ngambi terus ingatka jasa enggau pengawa ditegi suba lebuh ngetanka menua ari kuasa luar.
 
Panggau nya nyadi batang pengerami Festival Menuai enggau Ensera Rayat Sarawak ti diatur ninting taun Kampung Budaya Sarawak kenyau ari taun 1996.
 
Teater nya dikelulu dramatik seni pemerindang, muzik asal enggau elemen multimedia nya meri reti chukup besai enggau berasai ba ati, kelebih agi belemati ke pemerani enggau penau Rentap nyadi lambang ngelaban kuasa luar ba jeman ke-19.
 
Panggau teater nya mega digulu temuai khas, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol.
 
Tuju panggau teater Rentap nya mega ukai semina merindang aja, tang mega nyadi nalan belajar ke sejarah enggau budaya ti ulih ngasuh temegah ke pesaka ditegika anak Sarawak.
 
Dikena ngenang sukung komuniti, raban pengatur ngemendar tama meda panggau nya nadai bebayar ngagai semua pengusung sekumbang dua hari panggau pemerindang nya diatur, iya nya 24 enggau 25 Mei 2025.
 
Tuju festival ti menang Anugerah Sarawak Hornbill 2024 nya mega negapka kaul entara komuniti nengah pengerami pengelain budaya, sereta negapka pesaka nengeri enggau ngerichah industri dagang temuai lokal.
 
Panggau muzikal nya ngempung serap komuniti nengah pengawa mantaika ensera rayat enggau legenda lokal ari panggau kelulu ti chukup richah enggau merindang ati.
 
Seraya orang ti mai kelulu bujang berani Rentap iya nya Anding Indrawani seraya Melissa Francis megai kelulu Sawai, ngasuh panggau nya dianti bala mayuh ba festival taun tu. -EDISI UKAS