SIBURAN: Pengerami Sungai Kampung Simpok 2025 diatur baru enggau chukup pengerichah sereta mandangka penyelai budaya komuniti Bidayuh Bisapug sereta negapka semangat penyerakup komuniti menua nya.
 
Pengerami ninting taun ti diatur ba pelaman besai Mini Waterfront, Kampung Simpok nya udah dipenyadika Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Tarat, Dato Sri Roland Sagah Wee Inn kena Hari Enam.
 
Pengerami ti nyadi lambang penyerakup enggau pesaka komuniti nya belabuh diatur kenyau ari 2017, tang diketu enda lama ketegal pandemik COVID-19 sebedau ditampung baru ba taun 2022.
 
Pengawa ngatur sekali tu mega richah enggau pengawa nyua insentif pelajar ngagai 47 nembiak nyulut ari komuniti Bidayuh Bisapuq ti udah bulih pemutus nyulut ba peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM).
 
“Pemujur bala anak kitai ba pelajar nya mandangka penegap komuniti kitai. Pengerami baka tu ukai semina pemerindang aja, tang mega nalan negapka penatai diri enggau semangat deka mansang,” ku iya lebuh bejaku ba mua mayuh.
 
Kampung Simpok nya genturung pendiau pemadu besai etnik Bidayuh Bisapug dibagi ngagai enam zon iya nya Kandis, Serui, Pedat, Regu, Tengah enggau Tedontiang ke alai tetiap zon ngambi bagi ba bemacham aktiviti, nyengkaum beranyut ngena rakit dilagu manah ti narit ati bala pengusung.
 
Pengerami nya richah agi enggau penatai AirAsia Fun Team, kompeni penerebai ti bela nyadi bakih begulai ngatur pengerami taun tu.
 
Bansal bejual lokal ti nyual bemacham produk krafjari, pemakai asal enggau main rayat mega nyadi pematak, ngasuh Pengerami Sungai Simpok ukai semina nyadi nalan ngerami budaya aja, tang mega nalan ngulihka ekonomi komuniti dia.-EDISI UKAS