DUBAI: Atlit badminton Para Sarawak, Nurzammietul Syafiqqah Mohamad Zamberi ngemegahka kandang menua tu lebuh menang midul engkeraju ba achara berega champur ba pekit tebilang, FAzza Para Badminton Antarabansa Dubai 2025.
Ngari ke Malaysia, penyulut Shafiqqah nambahka penyampau midul tim menua enggau 3 midul emas, 1 pirak enggau 4 engkeraju, mantaika pengering enggau penau kontinjen badminton Para Malaysia.
“Penyulut Shafiqqah nya mandangka Sarawak majak tebilang nama ba kelang lumba Para, meransang agi pengeransing nengeri tu ngenegapka atlit timpang pendiau nengah program pemansang enggau sukung latih,” ku Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah ba siti penerang.
“Kami temegah ati meda kededua atlit badminton Para Sarawak, Nur Shafiqqah enggau Ashley Irenaeus sereta mega semua tim Para nasional kitai.
“Penyulut sida ba Dubai mandangka pengeransing ati bala atlit Para Malaysia ngelama tu.
"Sarawak deka terus negap, nyukung enggau nyagu bala atlit tu.”
Tim Malaysia mandangka atlit Para antarabansa ti ulih besemekih, beretan, landik sereta begempung.
Pekit ti diatur di Shahab Al Ahl Club Dubai kena 9 ngagai 11 Mei 2025 nya diatur The Dubai Club for People of Determination mujur ngempuru 14 pemain badminton menua enggau atlit badminton Para bukai ari selampur dunya ti ngerami penyulut enggau iklusiviti lumba Para. EDISI UKAS
