SIBU: Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee nerima manah juluk Serakup Indai Tunggal Wilayah Tengah Sarawak (PITWITS) ditu bisi begunan sida empu.
 
Iya madah ke diri deka nyerenih pekara nya enggau Opis Menteri Pemansang Indu, Nembiak Mit enggau Pengelantang Komuniti ngulihka sukung enggau perambu ari sida ungkup tanah nya.
 
“Siti ari juluk sida deka bisi begunan serakup kediri, lalu aku chukup beterima kasih ngagai Kaban Kunsil Nengeri (ADUN) Bukit Assek, Joseph Chieng Jin Ek, nengah Opis Tanah enggau Survei Sarawak udah ngelala sebidang tanah ti diperambu nyadi taba begunan serakup sida ila.
 
“Aku deka nyerenih pekara tu enggau Opis Menteri Pemansang Indu, Nembiak Mit enggau Pengelantang Komuniti ngulihka sukung enggau perambu ari sida ungkup tanah nya, ngambi sida tau merambu begunan nya enggau lenak agi.
 
“Aku mega deka meri sukung tegut ngagai inisiatif tu,” ku iya ngagai pemberita pengudah nemuai ke opis serakup nya ditu kena Hari Minggu.
 
Ba penemuai nya, iya udah ngatur randau enggau mendingka sekeda isu enggau peminta ari kaban serakup.
 
Iya ti mega Kaban Kunsil Nengeri (ADUN) Pelawan madah ke bala kaban serakup nya mega bisi minta bantu rumah murah.
 
“Enggau ati sinu, aku madah ke kandang diatu, kelimpah ari PPR Rantau Panjang ti semina ungkup suwa aja, sida mega tau minta bantu suwa ari Perintah Sarawak.
 
“Tang endur nya baka ke enda entu engkeman ba bala kaban.
 
“Aku mega madah ke diri benung merambu siti projek rumah murah ti baru. Aku agi nganti peminta dikemendarka Perintah Sarawak, lalu enti projek tu dikemendar, aku deka madah ngagai sida.
 
“Aku deka berundingka peminta sida lalu deka meri peluang ngagai sida minta ila,” ku iya.
 
Iya mega nyamin deka seruran sedia mantu serakup, kelebih agi ba sekeda kes tauka pekara berat, baka kaban ti deka ngepunka dagang mit tang enda nemu baka ni chara.
 
Ba penemuai nya, iya mega bisi nyua pemeri barang diguna enggau bungai serimbai ngintu Hari Indai.
 
“Aku deka meri terima kasih ngagai semua kaban serakup, kelebih agi bala indai.
 
“Nyadi indai tu pengawa ti chukup mulia laban sida mai empas besai ngagai komuniti, nerenak penyayau, likun enggau nempa ruang bilik ti gerai,” ku iya.
 
Iya mega muji pengawa bala indai ti ransing gawa, sereta ngaku pengawa indai ukai muntang, lalu jasa sida ngelama tu entara tepa pemadu berega ngagai komuniti.- EDISI UKAS