SIBU: Sarawak ngerikod defisit dagang pemakai sepenyampau RM6.44 bilion ba taun 2024, lalu nya nunjukka nengeri tu kelalu bepanggai ba pemakai import.
 
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, perintah nengeri ransing bejalaika transformasyen sektor betanam betupi bekenaka teknologi dikena nambahka asil lokal enggau enda agi kelalu bepanggai ba import.
 
“Betanam betupi patut nyingkang nuju sistem moden enggau ngena teknologi nentuka bekal pemakai seruran bisi ungkup timpuh panjai,” ku iya ba teks jaku dibacha Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail ba Konvensyen Betanam Betupi Serantau di Kelab Golf Sibu kena Hari Enam.
 
Konvensyen nya ngempuruka lebih 700 penyereta ari Malaysia, Indonesia enggau Brunei, nyadi nalan bekunsika penemu enggau inovasyen dikena ngemansangka sektor betanam betupi.
 
Dato Sri Dr Stephen mega madah ke rebak biak patut diparit ke dalam sektor nya ari ngangkatka sektor betanam betupi nyadi kereja profesional ti begaji besai.
 
“Kami deka ngubah peragam penemu senentang betanam betupi. Rebak biak diatu patut meda sektor tu nyadi peluang kereja ti bisi pengidup menyana dudi hari lalu begaji besai,” ku iya.
 
Entara inisiatif perintah nyengkaum numbuhka Agropark, Aquaculture Park, Sarawak Agrotechnology Park (SARTECH) enggau infrastruktur entali ai padi komersial, kelimpah ngenegapka industri benih lokal sereta matau biosekuriti.
 
Sama datai Kaban Kunsil Nengeri (ADUN) Bukit Assek, Joseph Chieng Jin Ek; ADUN Bawang Assan, Dato Sri Wong Soon Koh sereta temuai bukai.-EDISI UKAS