MUKAH: Kerejasama ari semua raban beguna endar dikena nentuka tetiap projek pemansang ti dipejalai ulih meri empas positif ngagai komuniti.
 
Ku Kaban Kunsil Nengeri (ADUN) Tellian Royston Valentine, pemansang ti mujur ukai semina nguntungka siti raban aja, tang meri pemaik ngagai semua komuniti.
 
“Enti sesiti pemansang nya meri empas ti manah, tentu mayuh raban ti deka bulih pemaik, ukai siti raban aja,” ku iya lebuh bejadika Hab Orang Dagang Nembiak Mukah kena Hari Enam.
 
Ngenang pasal pengawa ngelancharka hab nya, Royston muji inisiatif Kaunsil Pelilih Dalat enggau Mukah (MDDM) ti diperati chukup engkeman ngerandang peluang ngagai orang dagang biak lokal ngerembaika dagang diri.
 
Iya mega meransang bala pedagang enggau orang dagang lokal ngena manah pengelebih Mukah ti tebilang enggau asil pemakai tasik ngambi diangkat nyadi produk pematak penguna.
 
“Pedagang enggau orang dagang patut berundingka strategi makit ti narit ati, ngaga produk bisi kualiti sereta meri servis pemadu manah ngagai penguna,” ku iya madah baru.
 
Royston mega madah, pematak pengusung luar deka nyaup ngeranchakka ekonomi lokal lalu meri peluang bedagang ti besai agi di Mukah.
 
Pengawa nya mega bejadika MY Food Court ba ringkat atas Hab Orang Dagang Nembiak Mukah lalu MDDM ngatur Pengerami Ramah Tamah Aidilfitri MDDM 2025.
 
Sama datai, Sekretari MDDM Awang Abdul Razak Awang Bini, Walikota MDDM Aini bin Suhaili enggau Tuai Polis Pelilih Mukah DSP Muhamad Rizal Alias. -EDISI UKAS