KUCHING: Semangat penyerakup enggau begempung raban indu biak nyadi pugu Ngintu Hari Pengingat Sedunya 2025 diatur Serakup Pandu Puteri Malaysia (PPM) Pampang Sarawak, ba siti hotel tebilang ditu, kena Hari Enam.
 
Pengerami nya dipenyadika bini Yang di-Pertua Negeri Sarawak ti nyadi Penaung PPM Pampang Sarawak, Toh Puan Datuk Patinggi Fauziah Mohd. Sanusi.
 
Ngena sulu jaku 'Cherita Kitai (Our Story)', pengerami sekali tu mandangka pangku pengawa besai indu biak nempa komuniti ti begempung, progresif enggau ulih beretan, seriris enggau aspirasyen global Serakup Pandu Puteri enggau Pejilin Puteri Dunya (WAGGGS).
 
Entara batang pengerami ti narit ati iya nya pengawa nungkun dian, kelai pengarap enggau pengering ti diidup dalam diri genap kaban Pandu Puteri.
 
Sama datai, Tuai Pesuruhjaya PPM Sarawak Ruth Sibat, Yang di-Pertua PPM Sarawak Datuk Dayang Morliah Datuk Awang Daud, Mandal Yang di-Pertua PPN Sarawak Annie Sim, Tuai Pesuruhjaya Pejilin Sarawak John Lim Boon Beng sereta pengari ari Opis Pelajar Nengeri Sarawak.
 
Kelimpah ari nya, lebih 200 kaban Pandu Puteri ari sekula ngelingi Kuching nyengkaum Sekula Sekondari (SMK) St. Mary, SMK St. Teresa, Sekula Primari (SK) Matu Baru enggau SMK Matang Jaya ngambi bagi alai pengerami nya nyadi siti pelasar ngenegapka rentayan kaul enggau semangat nyadi tuai ngagai rebak tuai biak.-EDISI UKAS