KUCHING: Perintah Sarawak nyukung tegut inisiatif Komiti Pengatur Pengari 8 Batu (JKWW8) ba pengawa ngintu enggau ngidupka baru pegari Rumah Batu (RB) Datu Bandar Abang Muhammad Kassim Datu Bandar Abang Bolhassan (DBAK), ti kaya nilai sejarah enggau budaya.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, RB di Jalai Ajibah Abol nya endang patut diaku nyadi ‘Rumah Pesaka’ dikena nentuka rumah nya terus diintu manah sereta ulih ditampung rebak dudi.
 
Ku iya, Perintah Sarawak sedia meri sukung ari sukut teknikal enggsau belanja dikena ngamatka juluk nya, setipak enggau pengeran ngetanka pesaka budaya enggau sejarah kandang menua tu belalauka ukum syarak enggau undang-undang.
 
"RB tu ukai semina rumah aja laban bisi sejarah kediri empu. Mayuh ti enda nemu Kunsil Nengeri (DUN) kala baum ditu. Pekara tu udah chukup nyadi batang kebuah kitai patut ngaku iya nyadi Rumah Pesaka,” ku iya.
 
Iya nibar ke jaku nya lebuh bejadika Pengerami Ramah Tamah Hari Raya diatur JKWW8 di Hikmah Exchange, ditu kena Hari Enam.
 
Sama datai Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, Dewan Bandaraya Kuching Utara enggau Pekara Islam) Datuk Dr Abdul Rahman Junaidi, Sapit Menteri Kuasa enggau Pemeruan Rampa Menua Datuk Dr Hazland Abang Hipni, sereta bala temuai dipebasa ke bukai.
 
Nambah ke nya, Datuk Patinggi Abang Zohari madah ke isu wakaf ti bekaul enggau status tanah enggau begunan patut dulu agi diputar enggau bemalin ngagai Ordinan pemadu baru Kaunsil Islam Sarawak (MIS) sebedau sebarang pengawa ngaku ulih digaga.
 
Kelimpah ari nya, iya mega muji pengeransing enggau peneguh kaul lapan peturun DBAK ba pengawa ngemansangka baru RB, sereta ngaku profesional sida ti ulih merambu proses ngintu chara sistematik.
 
“Aku ngelempai ngagai semua kita ngatur RB. Aku deka mantu ni naka ulih ngambi kitai sama mulaika baru pegari nama begunan sejarah tu,” ku iya madah baru.
 
Kelai sukung, kelelapan peturun nya udah nerima saup belanja ari Wang Turu Rumah Batu, ti deka dikena merambu enggau bejalaika pengawa ngintu sereta aktiviti bekaul nampung sejarah enggau budaya rumah nya.
 
RB nyadi rumah Melayu keterubah enggau pemadu besai ti didiri taun 1863, ngena batu bata enggau semin, bebida enggau rumah kayu tradisional jeman nya.
 
Seraya JKWW8 nya pengari ti dipadu ngari ke peturun 8 ngambi ngatur tauka ngadu wakaf RB DBAK ti dipadu nengah Aum Besai ti diatur dua taun sekali. -EDISI UKAS