MARUDI: Penyiru Kaban Kunsil Nengeri (ADUN) Mulu, Datuk Gerawat Gala ngagai pengelantang peranak menua pesisir nyengala lebuh iya empu ngelawa Rumah Panjai Vincent di Tanjung Upar kena Hari Lima, ngulu Program Tuai Begulai Enggau Rayat.
 
Program diatur Komiti Pemansang enggau Pengelikun Genturung Pendiau (JKKK) Rh Vincent nya ngempuruka 70 peranak, nyengkaum bala tuai raban bansa ari sitak Puyut enggau Lubuk Nibung.
 
Lebuh bejaku ba mua mayuh, Datuk Gerawat ngemendarka pemeri ramu rumah baka tiang kayu berega RM85,000 ngagai 35 pintu rumah panjai ngena Geran Projek Mit Pemansang Menua Pesisir (MRP) DUN Mulu, nyadi bantu tumu mantu nyeleti struktur rumah ti udah lama.
 
Iya mega bisi ngenang pasal penanggul ampuh bah enggau gaya jalai tanah ti disebut Tuai Rumah Vincent Kiu, lalu madah ke randau udah diatur enggau Opis Tanah enggau Survei Sarawak (JTS) ngambi mindahka rumah panjai ke taba baru ti likun agi.
 
“Aku mega meransang peminta nengah Skim Ngentak Rumah Panjai Baru ari HDC ti nyendiaka agih belanja RM50,000. Kitai deka mayuh ari mayuh sukut,” ku iya.
 
Ba pengawa ngenegapka komuniti indu, agih belanja tambah RM3,500 bela diberi ngagai Serakup Indu Dayak Sarawak (SIDS) Unit Rh Vincent.
 
Program nya diasai nyadi pelasar ti engkeman endar dikena ngerapitka kaul entara tuai enggau rayat, kelimpah meri awak berandau terus pasal pemansang, perengkaguna pemun enggau pengelantang komuniti dia.-EDISI UKAS