KUCHING: Takah penerang patut dikedut agi dikena nentuka serap komuniti ulih ngasai pemaik pemansang ti dibai perintah.
 
Sapit Premier Sarawak, Datuk Amar Awang Tengah Ali Hasan madah, taja polisi perintah manah, nya enda deka meri pemaik ngagai komuniti enti sema enda datai ba raban diselinting.
 
Nya alai ku iya, gempung ukai dikuasa perintah (NGO) baka Angkatan Zaman Mansang Sarawak (AZAM) patut bejalaika pangku pengawa ba pengawa ngedutka takah nya.
 
“Nya alai, nuju semua kita, kitai patut meda utai ti nyata nyadi lalu nimpai ke mua.
 
“Ba pengawa ngemansangka nengeri, AZAM patut meri perati ngagai pengawa ngedutka takah penerang tu nyadi penyungkak pemansang nengeri,” ku iya.
 
Iya nyebut jaku nya lebuh bejaku ba AZAM Sarawak Ramah Tamah Aidilfitri: Raya Kali Tok ba siti hotel tebilang ditu kena Hari Empat.
 
Iya madah baru, AZAM mega ulih ngerembaika empas ukai semina ba Sarawak, tang mega ke selampur rantau ASEAN ari rentayan ti udah bisi ke alai sida ba penuduk ti manah nyadi penyukat serantau dalam komunikasyen pemansang.
 
Tu kelebih agi ba sukut baka kaul nembiak, pelajar digital, media bepuguka komuniti enggau inovasyen sosial, terang iya.
 
"Nilai begulai ti dipegai AZAM iya nya pengeran sida negapka sada menua pesisir, nempa raban tuai nembiak, enggau ngemansangka strategi komunikasyen digital kelebih agi lebuh kitai napi dunya global ti mansang deras,” ku iya.
 
Berebak enggau nya, Datuk Amar Awang Tengah mega bejadi pengawa ngelancharka website AZAM Sarawak baru ti deka nyadi rentayan rasmi komunikasyen ngagai agensi perintah, bala tuai komuniti, palan pelajar sereta bakih pemansang ari sektor luar enggau antarabansa.
 
Sama datai Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Sekretari Perintah Sarawak (Operasyen) Datu Hii Chang Kee, Chairman AZAM Sarawak Datu William Patrick Nyigor, Tuai Pegawai Eksekutif AZAM Sarawak Ali Suhaili sereta temuai dipebasa ke bukai. -EDISI UKAS