KUCHING: Angkatan Zaman Mansang Sarawak (AZAM) diperansang ngerembaika pangku pengawa enggau ngatur mayuh agi licha enggau forum pemansang dikena nambahka pemereti ati rayat ngagai agenda pemansang nengeri.
Sapit Sekretari Perintah Sarawak (Operasyen) Datu Hii Chang Kee madah, Perintah Sarawak udah bejalaika bemacham inisiatif baka ekonomi gadung enggau bekenaka hidrogen di baruh Pelin Pemansang Pengudah COVID-19 2030 (PCDS 2030), tang agi tubah rayat apin mereti ke tuju enggau kuing pemansang nengeri.
“Lebuh Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyebut pasal ekonomi gadung enggau kuasa hidrogen, kitai patut nanya sekali ke semua raban mereti ke nama utai disebut iya.
“Nya alai, kitai patut nentuka semua raban patut ba jalai ti sama lalu mereti ke agenda pemansang ti dibai perintah kitai.”
Iya nyebut jaku nya lebuh bejaku ba AZAM Sarawak Ramah Tamah Aidilfitri: Raya Kali Tok ti dipenyadika Sapit Premier Sarawak, Datuk Amar Awang Tengah Ali Hasan ba siti hotel tebilang ditu kena Hari Empat.
Iya madah baru, AZAM nyadi raban pemikir enggau bejalaika program pemansang runding rayat patut nurun gawa ngagai tetiap pelilih kandang dua ke tiga taun deka datai enggau kerejasama bala tuai dia.
Kelimpah ari nya, Datu Hii Chang Kee nyemetak madah ke pemesai guna nyukung pelin pemansang nengeri, kelebih agi datai ba taun 2030 ti semina beteda lima taun setengah da.
Ku iya, peminta nya diperati beguna endar nentuka rayat Sarawak begempung nyapai juluk ngangkatka nengeri tu nyadi nengeri maju manggai 2030.
“Tu ukai semina pasal pemansang fizikal aja, tang mega nempa pengawa industri enggai pemansang nengeri dudi hari. kitai meseti nyingkang mansang nyerumba visyen ti udah digaga Premier Sarawak,” ku iya.
Sama datai Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Chairman AZAM Sarawak Datu William Patrick Nyigor, Tuai Pegawai Eksekutif AZAM Sarawak Ali Suhaili sereta temuai dipebasa ke bukai. -EDISI UKAS
